फेवातालका डुङ्गा व्यवसायीको पीडा : पर्यटक नआउँदा दैनिकी चलाउनै समस्या
पोखरा । ओखलढुङ्गाका चित्रबहादुर मगरको दैनिकी गाउँघरमा राम्रै चल्दै थियो । बिहान उठ्यो, कुटो–कोदालो, मेलापात र अर्म–पर्ममै दिन बित्दै थिए । आफ्नै गाउँ छिमेकका आधा दर्जनभन्दा धेरै युवाले पोखराको फेवातालमा डुङ्गा चलाएर राम्रो आम्दानी गर्दै आएको गाउँभरी चर्चा चलिरहेको थियो । उनले पनि पोखरा आएर गाउँकै साथीसंगीसँग फेवातालमा डुंगा चलाउने योजना बनाए ।
२०७४ सालमा पोखरा आएका उनले साथीहरूसँगै फेवातालमा डुङ्गा चलाउन थाले । डुंगा चलाएर उनले राम्रै आम्दानी गरिरहेका थिए । यसैक्रममा कोरोनाभाइरसको संक्रमण जोखिमका कारण गत वर्ष चैतदेखि सरकारले जारी गरेको लकडाउन र निषेधाज्ञाले ६ महिना उनको डुङ्गा चल्न पाएन । पेशा व्यवसाय ठप्प बन्यो । डुङ्गा चलाएर दैनिक घरखर्चको जोहो गर्दै आएका मगरले आम्दानीको स्रोत नै बन्द भएपछि ज्याला मजदुरीको काम गरे ।
‘सरकारले लामो समयसम्म लकडाउन गरेपछि दैनिक खर्च धान्नका लागि ज्याला मजदुरीको काम गरेर खर्चको जोहो गरेँ,’ उनले भने, ‘लकडाउनसँगै डुङ्गा चलाउन बन्द भएपछि घर निर्माणको काममा चार÷ पाँच महिना मजदूरी गरेर घरखर्च जुटाएँ ।’
सरकारले लामो समयसम्म बन्दाबन्दी गरे पनि दैनिक ज्यालादारीमा काम गरेका आफूहरु जस्ता निम्न वर्गका मजदूरहरुका लागि राहतको व्यवस्था नगरेको उनको गुनासो छ । ‘लामो समयसम्म जारी बन्दाबन्दीमा पनि सरकारले हामीजस्ता निम्न वर्गका जनताका लागि कुनै राहतको व्यवस्था गरेन,’ उनले भने, ‘लामो समय कोठामै थुनिएर बस्दा पनि डुंगा व्यवसायी समितिले बाहेक कसैले राहत दिएनन् ।’
