आरुघाट: शब्दचित्रमा
-तीर्थराज अधिकारी ————————-
झुलून् अझै आँप फुलेर दाना
मीठा बनून् ती सबका खजाना
उँचो बनोस् हार्दिक पाठशाला
छर्दै गरोस् जीवनमा उज्याला ।१।
उद्यानमा वास-सुवास छाओस्
भए कतै राग र द्वेष भागोस्
चरी परी फर्फर पङ्ख छाऊन्
आनन्दले बालक रम्न पाऊन् ।२।
सुपुष्पका कोमल अङ्गलाई
आएर छामून् भमरा रमाई
यतै गरून् प्रेम मिलाप मौरी
खेलून् यतै शङ्करसाथ गौरी ।३।
चुलो र चम्को श्रमले उठाई
आराम गर्दा मन राम पाई
लिँदै मजा भोजनमा मिठास
बसोस् यतै लेक झरेर बास ।४।
होस् मार्ग यै सुन्दर लेक जाने
मिलोस् यतै सामल साथ लाने
कमालको माल बजार छाओस्
कुचालले भाल कतै नगालोस् ।५।
गोरा र काला कति रङ्गलाई
गर्दै रह्यो स्वागत क्वै बिदाई
नेपाल जाने पथ यो पुरानो
होला र यात्री कसमा बिरानो ? ६।
निवास यो प्रस्तर खोकिलामा
बन्यो अनौठो कुन कल्पनामा !
उदाउँदा घाम सुदूरबाट
खुल्दो छ नौलो दिल आरुघाट ।७।
नदी तरे धादिङ टेक्छ पाउ
उता-उता छन् अझ रम्य ठाउँ
छन् आपसी पर्व र पर्म मेल
खेल्ने कहाँ टिक्छ र धूर्त खेल ?८।
छन् स्वर्णदाना तट बालुवामा
ती हार बन्छन् करका कलामा
हुँदैन यो जीवन गल्न पानी
उसै कहाँ मिल्छ र जवानी ?९।
न हुन् कुनै मानव स्यालजस्ता
हटेर जाऊन् भ्रमजाल सस्ता
पिएर चोखो जल गण्डकीको
यात्रा बनोस् पावन जिन्दगीको ।१०।
यात्री बनी यो थल सुम्सुम्याऊँ
लिएर आस्था जल क्यै उठाऊँ
हिमालका निर्झर छाल झाँकी
भेट्दा कतै प्यास रहन्न बाँकी ।११।
हुन् नाम क्यै बोट र घाट आरु
बनोस् सबैको पथ एक चारु
यो गोरखाको रसदार माटो
देखाउने होस् सबमा सुबाटो ।१२।
———————— गोरखा ,लप्सीबोट ; हाल: काठमाडौँ – ६, सरस्वतीनगर ।
