गोरखाको चुनावी प्रतिवद्धता पूरा नगरी रुकुम लागे प्रचण्ड
नेपाली कम्युनिष्ट पार्टी (नेकपाका) संयोजक पुष्पकमल दाहाल प्रचण्ड आगामी फागुन २१ को प्रतिनिधि सभा निर्वाचनमा रुकुमपुर्व बाट चुनाव लड्ने भएका छन् । त्यसो त उनी प्रत्येक चुनावमा निर्वाचन क्षेत्र फेरिरहने व्यक्ति हुन् ।
यसअघि २०७९ मंसिर ४ को निर्वाचनमा उनी गोरखा २ बाट उठेका थिए । कांग्रेससँगको गठबन्धनमा उनले चुनाव जिते । तर चुनाव अघि उनले गरेका प्रतिवद्धता पुरा गर्न उनी असफल देखिए । लामो समयदेखि बन्द रहेको गोरखकाली रबर उद्योग र पालुङटार एयरपोर्ट संचालनमा ल्याउने उनको चुनावी एजेण्डा थियो । प्रत्येक भाषणमा उनले प्रतिवद्धता जनाउथे । तर चुनाव जितेर गएसँगै ती एजेण्डाहरु सेलायो । आफै प्रधानमन्त्री हुदाँ समेत रबर उद्योग र पालुङटार एयरपोर्ट संचालनका लागि उनले चासो दिएनन् ।
‘रबर उद्योगलाई नयाँ ढंगले अघि बढाइने छ, पालुङटार एयरपोर्टलाई पुनः संचालन गर्दै व्यवस्थित गरिनेछ,’ चुनाव लक्षित उनको प्रतिवद्धता पत्रमा उल्लेख थियो । तर चुनाव जितेसँगै यी प्रतिवद्धतालाई प्रचण्डले भुले । बुढीगण्डकी जलबिद्युत आयोजनापनि उनको चुनावी एजेण्डामध्येको एक हो । निर्माण कार्य तत्काल अघि बढाउने उनको त्यो प्रतिवद्धता बोलीमा मात्र सिमित बन्न पुग्यो । आयोजनाको अवस्था अहिले पनि उस्तै छ ।
उत्तरी गोरखाको चुमनुव्री र धार्चे गाउँपालिकालाई स्वायत्त क्षेत्र घोषण गर्न पहल गर्ने समेत उनले भन्न भ्याएका थिए । तर चुनाव जिते पश्चात ती एजेण्डामा उनी प्रवेश नै गर्न चाहेनन् । गाइखुर–च्याङली क्षेत्रमा राज्यले घोषणा गरेको औद्योगिक क्षेत्र निर्माण कार्य अगाडी बढाउने उनको चुनावी एजेण्डा पनि भाषणमा मात्र सिमित बन्यो ।
चुनाव अघिका प्रतिवद्धताहरु चुनाव जितेसँगै ओझेलमा परेपछि आलोचना समेत हुन थालेको छ । त्यही क्षेत्रमा अहिले नेकपाबाट लेखनाथ न्यौपाने उठ्ने भएका छन् ।
