बूढीगण्डकी प्रभावितलाई मुआव्जा प्रक्रिया ढिला गरिए आन्दोलन गर्ने कांग्रेसको चेतावनी
नेपाली काङ्ग्रेस गोरखाले बूढीगण्डकी प्रभावित आरुघाट, आर्खेत, विशालनगर, खहरे क्षेत्रका बासिन्दाका लागि तत्काल उचित मुआव्जा निर्धारण गर्न माग गरेको छ । सोमबार विज्ञप्ति जारी गरी काङ्ग्रेसले लामो समयदेखि घरजग्गा रोक्का राखिएको र अहिलेसम्म मुआव्जा निर्धारण पनि नगरिएको भन्दै यदि तत्काल मुआव्जा निर्धारण र वितरण नभए आन्दोलनका लागि आफूहरु बाध्य हुने चेतावनी पनि दिएको छ ।
‘पछिल्लो क्रियाकलाप हेर्दा सरकार नेपाली जनताको समस्या र आयोजना बनाउने प्रति उदासिन देखिएको हुदाँ नेपाली काँग्रेस तत्काल जनताको समस्या समाधान गरी आयोजना स्वदेशी लगानीबाटै निर्माण गर्ने कार्यको सुनिश्चित गर्न आग्रह गर्दछ’ विज्ञप्तिमा भनिएको छ ।
पार्टी सचिव नन्दप्रसाद न्यौपानेद्वारा हस्ताक्षरित विज्ञप्तिमा ‘परियोजनाले आवश्यक जग्गा भनी रोक्का गरेकोमध्ये गोरखाको आरुघाट बजार र आर्खेत बजार, धादिङ्गको बिशालनगर, त्रिपुरेश्वर र खहरे क्षेत्रका घर जग्गाको हालसम्म सरकारद्वारा मुआब्जा निर्धारण नहुनुले सो क्षेत्रको जनताप्रति राज्यद्वारा ठुलो अन्याय भएको नेपाली काँग्रेस गोरखाको ठहर छ’ भनिएको छ ।
हाल भएको मुल्य बृद्विलाई आधारमानी मुआब्जा रकम वृद्वि गरी जनतालाई उपलब्ध गराउनको निम्ति नेपाली काङ्ग्रेस जिल्ला कार्य समिति गोरखाले विज्ञप्तिमार्फत जोडदार माग गरेको छ ।
