उमेर हद नाघेको खेलाडी सहभागी गराएको भन्दै गोरखा नगरपालिकाको भलिबल टिम विरुद्ध उजुरी
गोरखा सदरमुकाममा सम्पन्न भएको ११ औँ जिल्लास्तरीय राष्ट्रपति रनिङशिल्ड प्रतियोगितामा गोरखा नगरपालिकाको भलिबल टिम विरुद्ध उजुरी परेको छ । आरुघाट गाउँपालिकाको भलिबल समूहले गोरखा नगरपालिकाको भलिबल समू विरुद्ध उजुरी दिएको जिल्ला खेलकुद विकास समितिका अध्यक्ष शान्तसिंह बस्नेतले बताए ।
गोरखा नगरपालिकाले भलिबल समूहमा उमेर हद नाघेका खेलाडीलाई सहभागी गराएको भन्दै आरुघाटको भलिबल टिमले उजुरी हालेको उनले जानकारी दिए । उक्त उजुरीबारे अहिले छानविन भइरहेको उनले बताए । छानविन समितिले प्रमाण जुटाउनका लागि गोरखा नगरपालिकासँग कागजात मागेको र यदि उजुरी गर्नेको प्रमाण पुगेको खण्डमा विजेताबाट पदक खोसिने उनले बताए । उमेर नाघेको बिषयमा प्रमाण नपुगेको खण्डमा यथावत हुने उनको भनाइ छ । समितिले एकदुई दिन भित्रमा निर्णय दिने उनले बताए ।
फाइनल खेलमा आरुघाट गाउँपालिकाको भलिबल टिमलाई पराजित गर्दै गोरखा नगरपालिकाको भलिबल टिमले स्वर्ण पदक जितेको थियो ।
जिल्ला खेलकुद विकास समितिको सदस्यको संयोजकमा रहेको छानविन समितिमा पालिकाका सामाजिक विकास समितिबाट एकजना र रेफ्रीमध्य एक जना सदस्य रहने उनले बताए ।
हालै सम्पन्न भएको राष्ट्रपनि रनिङ शिल्डको उपाधि भने सिरानचोक गाउँपालिकाले जितेको थियो । अव जिल्लास्तरीय प्रतियोगिता सम्पन्न भएसँगै प्रदेशको तयारीमा रहेको बस्नेतले बताए । उनका अनुसार प्रदेशस्तरीय राष्ट्रपति रनिङशिल्ड प्रतियोगिता आगामी पौष २६, २७ र २८ गते हुदैछ ।
