प्रदेश स्तरीय राष्ट्रपति रनिङ शिल्डमा गोरखाका ८८ खेलाडी सहभागी
अनुपमा खनाल
गण्डकी प्रदेश स्तरीय ११ औं राष्ट्रपति रनिङ शिल्ड प्रतियोगिता मा गोरखाका ८८ खेलाडी सहभागी हुने भएका छन् ।
जिल्लास्तरीय राष्टूपति रनिङ शिल्डमा हरेक विधामा उत्कृष्ट भएका ८८ खेलाडी प्रदेशस्तरीय प्रतियोगितामा सहभागी हुने भएका हुन् । पश्चिमाञ्चल क्षेत्रिय खेलकुद विकास समितिको आयोजनामा आज र भोली पोखरामा हुने प्रतियोगितामा सहभागीताका लागि जिल्लाका खेलाडी बुधबार नै पोखरा गएका छन् ।
उनिहरुलाई जिल्ला खेलकुद विकास समितिले बुधबार विहान विदाई गरेको थियो । प्रतियोगितामा सहभागी हुने खेलाडीका लागि उद्योग वाणिज्य संघ गोरखाले ट्रयाकसुट र गोरखा चेम्बर अफ कमर्सले जर्सि उपलब्ध गराएका जिल्ला खेलकुद विकास समितिका उपाध्यक्ष शान्तसिंह बस्न्यातले जानकारी दिए । गण्डकी प्रदेशका ११ जिल्लाका ९ सय २४ खेलाडीको सहभागिता रहने प्रतियोगितामा मार्शल आर्टतर्फ तेक्वान्दो, कराते, उशु खेल हुनेछन । अन्य खेलमा कब्बडी, भलिबल र एथलेटिक्सका खेलहरु समावेश गरिएको छ । छात्र छात्रा दुबै समुहमा ति खेल हुने बस्न्यातले बताए ।
प्रतियोगितामा धेरै पदक जित्न सफल जिल्लाले आर्कषक राष्टूपती रनिङ शिल्ड प्राप्त गर्नेछ । यो प्रतियोगितामा स्थानियस्तर हुँदै जिल्ला र प्रदेशमा स्वर्ण पदक जित्ने खेलाडीले असार २९ गतेदेखि काठमाण्डौमा शुरु हुने केन्द्रिय राष्टूपती रनिङ शिल्ड प्रतियोगितामा सहभागिता जनाउन पाउनेछन ।
यसैबिच, जिल्लाका नौ स्थानीय तहलाई पछि पार्दै यसबर्षको राष्टूपति रनिङ शिल्ड सिरानचोक गाउँपालिकाले हात परेको छ । सरस्वती मावि आहालेमा भएको जिल्लास्तरीय आठौं राष्टूपति रनिङ शिल्ड खेलकुद प्रतियोगितामा ६ स्वर्ण, ६ रजत र ६ कास्य सहित १८ पदक हात पार्दै सिरानचोकले उपाधी जितेको हो ।
प्रतियोगितामा ५ स्वर्ण, ४ रजत र ४ कास्य पदक सहित अजिरकोट गाउँपालिले १३ पदकका साथ दोस्रो भएको छ । त्यस्तै ५ स्वर्ण, ४ रजत र २ कास्य गरि ११ पदक सहित सहिद लखन गाउँपालिका तेश्रो भएको छ । शहिद लखनले ११ पदक प्राप्त गरेको आयोजक जिल्ला खेलकुद विकास समिति गोरखाका उपाध्यक्ष शान्तसिंह बस्नेतले जानकारी दिए ।
प्रतियोगितामा आरुघाट गाउँ पालिकाले ५ स्वर्ण, ३ रजत र ५ कास्य पदक जितेको छ । गण्डकी गाउँपालिकाले ५ स्वर्ण, ३ रजत र ४ कास्य, बारपाक सुलिकोट गाउँपालिकाले २ स्वर्ण, १ रजत २ कास्य पदक पाएको छ । भिमसेन थापा गाउँपालिकाले २ स्वर्ण, ५ रजत र ३ कास्य पदक जितेको छ ।
प्रतियोगितामा गोरखा नगरपालिका स्वर्ण पदक विहिन भएको छ । उसले ४ रजत र ३ कास्य सहित ७ पदक मात्र पाएको छ ।
धार्चे गाउँपालिकाले २ रजत र चुमनुब्रीले १ कास्य पदक मात्र जितेका छन् । प्रतियोगितामा एथलेटिक्स, हाइजम्प, लङजम्प, ज्याभलिन थ्रो लगायत ३० विधामा छात्रछात्राविच प्रतिस्पर्धा भएको थियो । पालुङ्टार नगरपालिका बाहेक सबै स्थानिय तह सहभागी प्रतियोगिता असार २२ देखि २४ गतेसम्म सञ्चालन भएको हो ।
