गण्डकी गाउँपालिकाको सत्प्रयास अक्षरसः लागु होओस्
भीमसेनथापा गाउँपालिकास्थित विन्द्रावती माविका प्रधानाध्यापक उत्तरनारायण श्रेष्ठ माओवादीको जनतासंग माओवादी विशेष रुपान्तरण अभियानअन्तर्गत तीन महिने अभियानको एक कार्यक्रममा मन्तव्य राख्दै गरेको तस्वीर सार्वजनिक भयो । त्यसपछि गण्डकी गाउँपालिकाको ज्ञानमार्ग माध्यमिक विद्यालयमा सोही अभियान अन्तर्गतको गतिविधि भएको तस्वीर पनि सञ्जालमा आयो ।
माओवादी अहिले सरकारको नेतृत्वमा छ । सरकारको नेतृत्वमा रहेको पार्टीको राजनीतिक अभियानका यस्ता तस्वीरले सायद गण्डकी गाउँपालिकाको नेतृत्वमा काउकुती लाग्यो । त्यसैले सोमबार एक सार्वजनिक सूचना जारी गर्दै गण्डकी गाउँपालिकाकाका कुनै पनि सामुदायिक विद्यालयका शिक्षकहरु राजनीतिक कार्यक्रममा सरिक नहुन निर्देशन जारी ग¥यो ।
यस्ता गतिविधि अरु गाउँपालिकामा पनि भएका छन् । माओवादीसंवद्ध शिक्षकहरुबाट पनि भएका छन्, कांग्रेस, एमाले वा जुनसुकै राजनीतिक पार्टीमा आस्था राख्ने शिक्षकहरुबाट राजनीतिक दलको सदस्यता लिने, राजनीतिक कार्यक्रममा सरिक हुने हर्कत गरेको पाइन्छ ।
यही बीचमा गण्डकी गाउँपालिकाले सबै शिक्षकहरुलाई राजनीतिक गतिविधिमा सरिक नहुन निर्देशन गरेर सार्वजनिक गरको यो निर्णयको वाहवाही भएको छ ।
मानिस राजनीतिक प्राणी हो । विश्वमा हुने कुनै पनि गतिविधि राजनीतिबाट अछुत छैन । शिक्षा क्षेत्र पनि राजनीतिबाट अछुतो हुने कुरै भएन । तर शिक्षा क्षेत्रमा राजनीति हुन्छ भन्दैमा शिक्षक राजनीतिक अग्रमोर्चामा उभिएर गतिविधि गर्नुपर्छ भन्ने छैन ।
अक्सर शिक्षकहरुले राजनीतिक दलको शुभेच्छुक संस्थाको सदस्यता लिएका पनि हुन्छन् । सोही संस्थामार्फत अनौपचारिक रुपमा आफ्नो आस्था भएको पार्टीलाई सहयोग गरेका हुन्छन् । यसलाई विद्यमान कानूनले वैध ठान्छ । तर राजनीतिक पार्टीकै सदस्यता लिएर राजनीतिक पार्टीको कार्यक्रमको अग्रपंत्तीमा सरिक हुने गर्छन् । यो मनासिब काम होइन ।
कुनै राजनीतिक पार्टीमा आस्था राख्नु जायज छ । सहयोग गर्नु जायज छ । फुर्सदका बेला कार्यक्रम हेर्न, सुन्न जानु मनासिब छ, तर कार्यक्रमको नेतृत्व गर्ने, व्यवस्थापन गर्ने, भाषण गर्ने काम भने वर्तमान कानूनमा बर्जित छ । त्यसैले अन्य पालिकाले पनि यस्ता निर्णयलाई देखासिकी गर्दा बेसै हुन्छ ।
