सिन्धुपाल्चोकमा पहिरोको कहर : पीडित भन्छन् – हामीलाई सुरक्षित स्थानमा सारियोस्
२०७२ सालमा विनाशकारी भूकम्पले सबैभन्दा ठूलो चोट दिएको सिन्धुपाल्चोकवासीलाई यस वर्षको भारी वर्षा र पहिरोले अर्को घाउ लगाइदिएको छ । यो वर्षको मनसुन सुरु भएयता सिन्धुपाल्चोकमा पहिरोका कारण ७७ जनाले ज्यान गुमाएका छन् भने ३८ जना वेपत्ता भएका छन् । यस्तै झन्डै ३३ सय परिवार थातथलो छोडेर विस्थापित भएका छन् ।
बाह्रबिसे, नागपुजे र भीरखर्कका स्थानीयले आफ्नो बस्ती जोखिमका रहेकोले सुरक्षित स्थानमा सारिदिन आग्रह गरेका छन् । गत भदौ २८ गतेको पहिरोले गाउँ थङथिलो पारेको र सो स्थानमा बस्नका लागि सुरक्षित नभएको उनीहरुको भनाई छ ।
भीरखर्ककी कान्छी लामा र मसली अधिकारी अहिले विस्थापित भएका छन् । उनीहरु अहिले टेन्टमा बसेका छन् । बस्ती जोखिममा रहेकाले सुरक्षित सारिदिन आग्रह गरेका छन् । गाउँको दायाँ बायाँ र माथिबाट पहिरो आएको गाउँको बीच भाग बाँकी रहेको उनीहरुले बताए ।
