युएनडिपीद्वारा कोभिड १९ बाट बच्न गोरखामा आधारभूत स्वास्थ्य सामग्री वितरण
युएनडिपीले कोभिड १९ को संक्रमणबाट बच्न तथा बचाउन गोरखाका स्थानीय तह, सुरक्षाकर्मी, स्वास्थ्यकर्मी, सञ्चारकर्मीहरुलाई विभिन्न आधारभूत स्वास्थ्य सामग्री वितरण गरेको छ ।
युएनडिपीले दुईवटा नगरपालिका, छ वटा गाउँपालिका, जिल्ला अस्पताल, जिल्ला प्रशासन कार्यालय, प्रहरी, सेना, पत्रकारलाई सर्जिकल मास्क, सेनिटाइजर, पञ्जा र सूचनमूलक सामग्री प्रदान गरेको हो ।
विश्वव्यापी रुपमा फैलिएको कोरोना भाइरस अर्थात कोभिड १९ बाट हुनसक्ने महामारीबाट सचेत हुन र बच्न सर्जिकलमास्क, सेनिटाइजर, पञ्जासहित सुचनामूलक सामग्री वितरण गरिएको युएनडिपीका जिल्ला संयोजक राम सापकोटोले जानकारी दिए ।
सापकोटाले युएनडिपीबाट प्राप्त उक्त सामग्रीहरु बिहिबार गोरखा नगरपालिका, जिल्ला प्रशासन कार्यालय र पत्रकार महासंघ गोरखालाई हस्तान्तरण गरिएको हो । यस्तै युएनडिपीले गोरखानगरपालिका, पालुङटार नगरपालिका, धार्चे, गण्डकी, आरुघाट, सिरानचोक, अजिरकोट र शहिदलखन गाउँपालिकामा उक्त सामग्री वितरण गरेको छ । प्रत्येक स्थानीयतहमा तीनसय थान मास्क, एकसय थान सेनिटाइजर र एकसय थानका दरले पन्जा वितरण गरिएको सापकोटाले जनाए ।
यस्तै, जिल्ला प्रशासन कार्यालयमा दुईसय ५० थान मास्क, एकसय थान सेनिटाइजर र एकसय थान पञ्जा वितरण गरिएको छ । जिल्लामा कार्यरत पत्रकारका लागि समेत एकसय थान मास्क, २५ थान सेनिटाईजर र २५ थान पञ्जा हस्तान्तरण गरिएको छ ।
युएनडिपीले कोरोना भाईरसको संक्रमणबाट जोगिन तथा सचेत रहनका लागि सूचनामूलक सामग्री समेत सबै स्थानीय तह, जिल्ला प्रशासन कार्यालय, जिल्ला प्रहरी कार्यालय र पत्रकार महासंघ गोरखालाई हस्तान्तरण गरेको छ ।
