उत्तरी गोरखाको तिब्बती सीमा क्षेत्र र सीमा स्तम्भको संयुक्त अनुगमन
उत्तरी गोरखाको सामागाउँ र साम्दोस्थित नेपाल प्रहरी र सशस्त्र प्रहरी(बिओपी)को संयुक्त टोलीले नेपाल–तिव्वत सीमा स्तम्भ तथा सीमा इलाकाको संयुक्त अनुगमन गरेको छ । चुमनुब्री गाउँपालिका १ साम्दोमा रहेको बोर्डर आउटपोस्ट(बिओपी)का सशस्त्र प्रहरी, प्रहरी चौकी सामागाउँका नेपाल प्रहरी, जनप्रतिनिधि र अन्य स्थानीयबासीको संयुक्त टोलीले बुधबार रुइला नाका र त्यहाँ रहेको ३५ नंबर सीमा स्तम्भको अवलोकन, निरीक्षण गरेको हो ।
‘बिओपीका टिम लिडर इन्स्पेक्टर आकास सुचीकारको नेतृत्वमा १० जना टोली, सामागाउँ प्रहरी चौकीका दुईजना प्रहरी, वडा सदस्य पासाङ लामा, साम्दो, सामागाउँ र स्याला गाउँका स्थानीयबासीको टोली गएका थिए’, सशस्त्र प्रहरी गोरखा गुल्मका प्रमुख डिएसपी ढलप्रसाद काफ्लेले भने, ‘यो हाम्रो लङ रुट पेट्रोलिङ कार्यक्रम अन्तर्गत हो । यस क्रममा कुनै त्यस्तै उल्लेख्य कुराहरु भेटिएनन् । सबै सामान्य नै पाइयो ।’ प्रत्येक महिना, दुई महिनामा यस्ता एलआरपी हुने गरेको छ ।
साम्दो बिओपीले ३४ नंबर पिलर रहेको ग्याला नाका, ३५ नंबर पिलर रहेको रुइला नाका र ३६ पिलर रहेको लाजुन नाका क्षेत्रको सुरक्षा गर्दै आएको उनले बताए ।
३८ नंबर र ३९ नंबर पिलर रहेको छेक्या र बाजु क्षेत्रको सुरक्षार्थ राख्ने भनिएको बिओपी भने अहिलेसम्म स्थापना गरिएको छैन ।
दुईपक्षीय विविध विषयमा छलफल गर्न बिगत दुईबर्षदेखि सीमा बैठक पनि नभएको स्थानीयको भनाइ छ । तस्वीर ः बिओपी साम्दो ।
