बेनिघाट–आरुघाट–लार्के सडकका लागि ५१ करोड बजेट सुनिश्चित
गोरखालाई चीनको तिब्बतसँग जोड्ने उद्देश्यले नेपाली सेनाले निर्माण गरिरहेको बेनीघाट–आरुघाट लार्के सडकका लागि यस वर्ष ५१ करोड बजेट सुनिश्चित भएको हो ।
धार्चे गाउँपालिकाको केन्द्र माछिखोलादेखि हावाडाँडासम्म सडक कालोपत्रेका लागि ५१ करोड बजेट सुनिश्चित भएको धार्चे गाउँपालिकाले जनाएको छ । गोरखा क्षेत्र नं १ का प्रतिनिधि सभा सदस्य एवं निवर्तमान गृहमन्त्री सुधन गुरुङले पनि आफ्नो सामाजिक सञ्जाल फेसबुकमार्फत सडक कालोपत्रेका लागि बजेट सुनिश्चित भएको जानकारी दिएका छन् ।
माछिखोलादेखि धार्चे–७ हावाडाँडासम्म सडक कालोपत्रेका लागि अर्थ मन्त्रालयबाट ५१ करोडको स्रोत सहमति स्वीकृत भएको गुरुङले जनाएका छन् ।
बेनिघाट–आरुघाट–लार्के सडक अन्तरगत हालसम्म ४२ किलोमिटर मा ट्रयाक (मार्ग) खुलेको छ । यस्तै, ३६ किलोमिटरमा सवारीसाधन चल्न थालेका छन् । चुमनुब्री गाउँपालिका–३ पेवासम्म मार्ग खनिएको छ । पाङसिङसम्म मोटर पुगेको छ ।
बेनीघाट, आरुघाट, लार्के सडकको एक सय ५४ किलोमिटरमध्ये धार्चे–७ हावाडाँडाबाट ९२ किलोमिटर सडकको काम नेपाली सेनाले गरेको हो । ठूला पहरा र कडा चट्टान भएकाले विस्फोटनको काम गर्न सडक विभागले सो खण्डको काम गर्ने जिम्मा सेनालाई दिएको थियो ।
चीनको सीमा लार्के भन्ज्याङसम्मको एक सय ५४ किलोमिटर खण्डमध्ये बेनीघाटबाट हावाडाँडासम्मको ६२ किलोमिटरसम्मको काम भने गोरखा सडक योजना कार्यालयले गरेको हो । सेनाले मार्ग खोलेर गाडी चल्न सक्ने बनाएको दोभानसम्मको खण्ड पनि गोरखा सडक योजना कार्यालयलाई हस्तान्तरण गरेको छ ।
सडक योजना कार्यालय र सेनाले निर्माण गरेको गरी जम्मा ९७ किमी खण्डमा सवारीसाधन चल्न थालेका छन् । बर्खाका बेला पनि सवारीसाधन आवागमन गर्न सजिलोका लागि नेपाली सेनाले माछीखोलामा बेलीब्रिज निर्माण गरेको छ ।
बेनीघाटबाट आरुघाट हुँदै आर्खेतसम्म सडक निर्माणको काम २०५२ सालमा सुरु भएको थियो । आर्थिक वर्ष २०६३÷६४ मा बेनीघाट आरुघाट लार्केभञ्ज्याङ सडक नामकरण गरिएको थियो । आव २०६६÷६७ मा मात्र उक्त सडक निर्माण सुरु भएको थियो । तर हावाडाँडाबाट एक किलोमिटर क्षेत्र कडा चटानयुक्त भिर रहेकाले पाँच वर्षसम्म ट्रयाक खोल्ने काम अगाडि बढ्न सकेन ।
कठिन मानिएको ९२ किमी खण्डको काम गर्न सडक विभागले २०७४ वैशाखमा नेपाली सेनालाई हस्तान्तरण गरेको हो । विसं २०७३ मङ्सिरमा मन्त्रिपरिषद् बैठकबाट निर्णय भएपछि नेपाली सेनाले २०७४ वैशाखदेखि काम सुरु गरेको थियो ।
उक्त सडक धार्चे गाउँपालिकाको लापुबेँसी, माछाखोला, जगत हुँदै चुमनब्री गाउँपालिकाको सिर्दिबस, बिही, प्रोक, सामागाउँ, साम्दो हुँदै चीनको सीमा लार्केभञ्ज्याङ जोडिने छ । उक्त सडकलाई उत्तरी गोरखाको लाइफ लाइनका रूपमा हेरिएको छ ।
