यस वर्ष जिल्लाबाट ३७ सय विद्यार्थीहरुले एसईई दिँदै
शारदा माविको परीक्षार्थी शून्य
माध्यमिक शिक्षा परीक्षा (एसईई) २०८२ मा गोरखाबाट तीनहजार सात सय ९७ जना विद्यार्थीहरु सहभागी हुने भएका छन् । शिक्षा विकास तथा समन्वय इकाई गोरखाका अनुसार यस वर्षको एसईईमा जिल्लाबाट नियमिततर्फ २९ सय ७२ जना विद्यार्थीहरु सहभागी हुने छन् ।
ग्रेडबृद्धितर्फको परीक्षामा भने आठ सय २५ जना विद्यार्थीहरु सहभागी हुने निमित्त इकाई प्रमुख विश्वप्रकास रेग्मीले बताए । यही चैत १९ गतेबाट २९ गतेसम्म संचालन हुने परीक्षाको सम्पूर्ण तयारी पूरा भैसकेको रेग्मीले जानकारी दिए ।
उनले भने, ‘विद्यार्थीहरुको प्रवेशपत्र विद्यालयहरुमा पठाइसकेका छौँ । राष्ट्रिय परिक्षा बोर्डको तर्फबाट जिल्लामा आउनुपर्ने सम्पूर्ण आवश्यक परीक्षा सामाग्रीहरु पनि आइसकेको अवस्था छ । यही हप्ताभित्र परीक्षा केन्द्राध्यक्ष नियुक्त गरि अभिमुखीकरण कार्यक्रम सम्पन्न गर्ने तयारीमा छौँ ।’
रेग्मीका अनुसार यस वर्ष जिल्लाबाट प्राविधिकतर्फ ८२ जना विद्यार्थीहरुले परीक्षा दिने छन् । गण्डकी गाउँपालिकाको घ्याच्चोक स्थित ज्ञानमार्ग मावि, भिमसेनथापाको नवजागृती चण्डी मावि, पालुङटारको त्रिवेणी मावि सेरा र आरुघाटको भवानी मावि मान्बुमा प्राविधिक धारको पढाई हुने गरेको छ ।
एसईई परीक्षामा जिल्लाभरका १३५ वटा विद्यालयहरुले सहभागिता जनाउने छन् । एसईईमा गोरखा नगरपालिकाबाट मात्र २६ वटा विद्यालय सहभागी हुँदै छन् भने सबैभन्दा थोरै उत्तरी गोरखाको चुमनुब्री गाउँपालिकाबाट दुईवटा विद्यालयका विद्यार्थी सहभागी हुँदै छन् । चुमनुब्रीको बुद्ध मावि फिलिम र ल्हो मावि, ल्होले एसईईमा सहभागीता जनाउनेछ ।
यस वर्ष पालुङटारको शारदा माविले एसईई परीक्षामा सहभागिता नजनाउने शिक्षा विकास तथा समन्वय इकाईका शाखा अधिकृत विश्वप्रकाश रेग्मी बताउँछन् । विद्यालयमा एसईई दिने विद्यार्थी नै नभएपछि उक्त विद्यालयले सहभागीता नजनाएको उनले जानकारी दिए ।
यसवर्ष खुल्ला विद्यालय अन्तरगत जिल्लाबाट १३ जना विद्यार्थीहरुले एसईई दिँदै छन् । उनीहरु मध्ये १० जना नियमिततर्फका र बाँकी ३ जना ग्रेडबृद्धितर्फका छन् ।
जिल्ला शिक्षा कार्यालयले एसईई परीक्षा संचालनका लागि जिल्लाभर २३ वटा परीक्षा केन्द्रहरु तोकेको छ । उत्तरी गोरखाको चुमनुब्री गाउँपालिकामा भने परीक्षा केन्द्र तोकिएको छैन् । विकट मानिने धार्चे गाउँपालिकामा १ र आरुघाट गाउँपालिकामा २ वटा परीक्षा केन्द्रहरु छन् । जिल्लाको सहिदलखन, बारपाक सुलिकोट, सिरानचोक र गण्डकी गाउँपालिकामा पनि २÷२ वटा परीक्षा केन्द्रहरु कायम भएका छन् ।
भिमसेनथापा गाउँपालिकामा भने ३ वटा परीक्षा केन्द्र कायम भएका छन् भने अजिरकोट गाउँपालिकामा एउटा मात्र परीक्षा केन्द्र छ । पालुङटार नगरपालिकामा भने दुईवटा परीक्षा केन्द्र कायम भएको शिक्षा विकास तथा समन्वय इकाई गोरखाले जनाएको छ । जिल्ला सदरमुकाम समेत रहेको गोरखा नगरपालिकामा भने ६ वटा परीक्षा केन्द्रहरु कायम भएको कार्यालयको भनाई छ ।
गत वर्ष २०८१ को एसईईमा चारहजार चारसय ८० जनाले सहभागिता जनाएको गोरखामा यसवर्ष विद्यार्थी सङख्या केही घटेको छ । विद्यार्थी सङ्ख्या घट्दै गएको भन्दै शिक्षा अधिकृत विश्वप्रकाश रेग्मीले भने, ‘गत वर्ष जिल्लाको एसईई परीक्षा नतिजा राम्रो थिएन । त्यसैले कमजोर विद्यार्थीहरुलाई पुनः ९ कक्षामा दोहो¥याएको कारण यस वर्ष एसईई दिनेको सङख्या तुलनात्मक रुपमा कम देखिएको हो । आगामी वर्ष एसईई दिने विद्यार्थीको सङख्या पुनः बृद्धि हुने हाम्रो तथ्याङकले देखाएको छ ।’
