निर्वाचन कर्मचारीलाई मतदानस्थल पुग्न तीनदिन हिड्नुपर्ने
आउँदो फागुन २१ गते हुने प्रतिनिधिसभा सदस्यहरुको निर्वाचनका लागि निर्धारित गोरखाका २२५ मतदान स्थलमध्य २४ वटा स्थल सडक सञ्जालबाट टाढा रहेका छन् । अधिकांश हिमालपारिको चुमनुब्रीका र केही धार्चेका मतदानस्थलहरु सडक सञ्जालबाट टाढा रहेका निर्वाचन कार्यालयले जनाएको छ ।
चुमनुब्री गाउँपालिकाका २३ र धार्चेका १ मतदानस्थल सडक सञ्जालले नछोएको ठाउँमा रहेका कार्यालयले जनाएको छ ।
निर्वाचनका कर्मचारी तथा सुरक्षाकर्मीहरु चुमनुब्री गाउँपालिकाका मतदानस्थल पुग्न कम्तीमा तीनदिन पैदल हिड्नु पर्ने बाध्यता छ । सबैभन्दा टाढा चुमनुब्री १ को साम्दो आधारभूत विद्यालयकेन्द्र रहेको छ । त्यहाँसम्म पुग्न सडक पुगेको चुमनुब्री ३ पाङसिङबाट कम्तीमा तीन तथा चार दिनसम्म पैदल हिड्नुपर्छ ।
त्यस्तै सोही वडाको गौरीशंकर आधारभूत विद्यालय मतदानकेन्द्र पुग्न पनि कम्तीमा तीन दिन पैदल हिड्नुपर्छ । वडा नं. ७ को छुलेनिले आधारभूत विद्यालय केन्द्र पुग्न पनि तीन दिन हिड्नुपर्छ । जिल्ला निर्वाचन कार्यालयले उपलब्ध गराएको विवरणअनुसार चुमनुब्री वडा नं. २ को गाविस भवन स्यो केन्द्र, सामुदायिक भवन ल्हो केन्द्र, वडा नं. ७ कै वुद्ध आधारभूत विद्यालय केन्द्र र छेकम आधारभूत विद्यालय केन्द्र पुग्न पनि निर्वाचनका कर्मचारीहरु सडक पुगेको ठाउँ पाङसिङबाट दुई दिनसम्म पैदल हिड्नुपर्छ ।
वडा नं. ४ को प्रोक आधारभूत विद्यालय प्रोक, हिमचुली आधारभूत विद्यालय छाक, नाम्रुङ स्वास्थ्यचौकी केन्द्र, क्वाक आधारभूत विद्यालय क्वाक पुग्न पनि मोटरबाटो पुगेको पाङसिङबाट दुई दिन पैदल हिँड्नुपर्छ । कार्यालयबाट प्राप्त विवरण अनुसार क्राक आधारभूत विद्यालय केन्द्र, गुम्बाहिमाली आधारभूत विद्यालय केन्द्रसम्म पुग्न निर्वाचन कर्मचारी तथा सुरक्षाकर्मी मोटरबाट ओर्लेर एक दिनभरि पैदलयात्रा गर्नुपर्ने बाध्यता छ ।
त्यस्तै वडा नं. ६ को सिप्चेत आधारभूत विद्यालय केन्द्र, चुम्लिङ आधारभूत विद्यालय केन्द्र, सिद्धगणेश आधारभूत विद्यालय केन्द्र र खार सामुदायिक खोपकेन्द्र पुग्न पनि मोटरबाट ओर्लेर अर्को एक दिन पुरै पैदल हिड्नु पर्ने बाध्यता रहेको छ ।
वडा नं. ३ को वुद्ध मावि केन्द्र, वुद्ध हिमाली आधारभूत विद्यालय न्याक केन्द्र, सिदुङ आधारभूत विद्यालय सस्र्यू केन्द्र, फिलिम आधारभूत विद्यालय पाती केन्द्रमा पनि सडक सञ्जालले जोडेको छैन । ती केन्द्रहरुसम्म पुग्न गाडीबाट ओर्लेर एकघण्टादेखि चारघण्टासम्म पैदल हिँड्नुपर्ने दुरीमा छन् ।
धार्चे गाउँपालिका १ हुलचुक मतदानकेन्द्रसम्म पनि सडक निर्माण गरिएको भएपनि मोटर नचल्ने वडाअध्यक्ष रामसिङ गुरुङको भनाइ छ । बूढीगण्डकीमा पुल नहुँदा सडक खनेको भए पनि त्यहाँको इच्छा आधारभूत विद्यालय केन्द्रसम्म गाडी नपुग्ने उनको भनाइ छ । सडकबाट करिब दुईघण्टाको पैदल दुरीमा मतदानकेन्द्र रहेको उनको भनाइ छ ।
ती मतदानकेन्द्रहरुबाट मतपेटिका ओसार्न बिगतमा हेलिकोप्टरको प्रयोग गर्ने अभ्यास रहेकाले यो निर्वाचनमा पनि हेलिकोप्टरको माग गरिएको प्रमुख जिल्ला अधिकारी तुलसी श्रेष्ठको भनाइ छ । ‘भौगोलिक अवस्थिति त्यस्तै छ । त्यसैले बिगतदेखि नै हेलिकोप्टरमा मतपेटिका ओसार्ने अभ्यास रहेकाले यसपटक पनि त्यसका लागि पहल भइरहेको छ’, उनले भने ।
