कालोपत्रे भएको सडकमा भाडा घटाउन प्रजिअसंग नागरिक समाजको अनुरोध
गोरखा सदरमुकाम भएर बिभिन्न ठाउँमा जाने पक्की सडकमा भाडा घटाउन गोरखाका नागरिक समाजले प्रमुख जिल्ला अधिकारीको ध्यानाकर्षण गराएका छन् । नागरिक साझा सवालको अगुवाईमा पत्रकार महासंघ गोरखा, गैरसरकारी संस्था महासंघ, मानव अधिकार तथा शान्ति समाज र सोच नेपालले संयुक्त रुपमा प्रशासनको ध्यानाकर्षण गराएका हुन् ।
गोरखादेखि भच्चेक,बुङकोट, घ्याम्पेशाल, पालुङटार लगायत बिभिन्न ठाउँमा सडक कालोपत्रे भएको तर कच्ची अबस्थामा हुँदा निर्धारण गरेको भाडा लिने गरेकाले भाडादर पुनर्निर्धारण गर्न प्रजिअलाई अनुरोध गरिएको छ । बैज्ञानिक भाडादर कायम गरी कार्यान्वयन गर्न प्रजिअको ध्यानाकर्षण गराइएको छ ।
यस्तै १२ वर्ष मुनिका बालवालिकालाई कोभिड बिरुद्धको खोप तत्काल लगाउनु पहल गरिदिन पनि नागरिक समाजका अगुवाहरुले अनुरोध गरेका छन् ।
सरकारले घोषणा गरेको स्थानीय तहको निर्वाचनका लागि चुनावी कार्यक्रम सुरु भइसकेकाले यस समयमा हुन सक्ने मुठभेड र जनताको जिउधनको रक्षाका लागि ध्यान दिन ध्यानाकर्षण पत्रमा अनुरोध गरिएको छ । नागरिक साझा सबाल गोरखाका संयोजक स्थानेश्वरदुवाडीले प्रजिअ शंकरहरी आचार्यलाई पत्र बुझाएका हुन् ।
प्रमुख जिल्ला अधिकारी आचार्यले यी तीनवटै विषयमा आफु संवेदनशिल रहेको र काम गरिरहेको बताए । बैज्ञानीक भाडादर कायम गर्न छलफल गरिरहेको बताउँदै उनले चुनाव लक्षित योजना र शान्ति सुरक्षाको बारेमा आफु संवेदनशिल भएको बताए ।
