बारपाक सडकखण्डको ७० प्रतिशत काम सम्पन्न
एघारकिलो छेवेटार बारपाक भालुस्वाँरा सडक आयोजना कार्यालयको मुख्य दायित्व रहेको ११ किलो–छेवेटार–भाँलुस्वारा–बारपाक सडकखण्ड निर्माणको काम जम्मा ७० प्रतिशत मात्र सम्पन्न गरेको कार्यालयले जनाएको छ ।
उक्त सडकखण्ड दुईवटा प्याकेजमा निर्माण कार्य चलिरहेको छ ।
दुईवटा प्याकेजमध्ये २२ किलोदेखि ३० किलोसम्म लोहनी एण्ड ब्रदर्स कन्सट्रक्सनले र ३० देखि ४६ किलोमिटरसम्म रसुवा इलाइट सूर्य जेभीलाई ठेक्का दिइएको कार्यलय प्रमुख यादवले जानकारी दिए ।
२०७३ सालमा लोहनी एण्ड ब्रदर्स कन्सट्रक्सनसँग सम्झौता भए अनुसार कामको म्याद पूरा भइसकेको छ । तर काम भने जम्मा ७० प्रतिशत मात्र सम्पन्न भएको छ । कूल १० करोड रुपैयाँको बजेटमा करिब ७ करोड भुक्तानी भइसकेको कार्यालय प्रमुख यादवले बताए । ‘कोरोना र बर्षायामले गर्दा काम ढिलो भएको हो, जसरि पनि सम्पन्न गराएर छाड्छौ’, यादवले भने ।
२०७४ सालमा रसुवा इलाइट सूर्य जेभिसँग सम्झौता भएको थियो । कामको म्याद पुस १४ सम्म रहेको छ । काम भने ७५ प्रतिशत सम्पन्न भएको छ । ३५ करोड रुपैयाँ बजेट रहेकोमा २५ करोड रुपैयाँ भुक्तानी भइसकेको कार्यालयले जनाएको छ ।
