‘दुई महिनादेखि खाद्यान्न ढुवानी भएन, अहिले बाटो नै छैन’
निषेधाज्ञाका कारण दुई महिनादेखि खाद्यान्न ढुवानी हुन नसकेको उत्तरी गोरखामा दुई साता अघिको बाढीले आवतजावत ठप्प हुँदा खाद्यान्न अभाव हुन थालेको छ । कोरोना संक्रमणको डरले खच्चडबाट खाद्यान्न ढुवानी बन्द गरिएको र अहिले बाढी पहिरोका कारण बाटो बन्द हुँदा रोकिएको स्थानीयले बताएका छन् ।
‘स्थानीय बजारमा पनि अहिले खाद्यान्न छैन’, चुमनुब्री ४ का लाक्पाडुण्डुप लामाले भने, ‘बाटो पनि नहुने हो भने अब खाने कुराको हाम्रो क्षेत्रमा अभाव हुने भयो ।’ चामल, नुन, तेल स्थानीय बजारमा अभाव हुन थालेको उनले बताए । तिब्बतसँग सिमाना जोडिएको उत्तरी गोरखाको चुमनुब्री र सँगैको धार्चे गाउँपालिकालाई खाद्य ब्यवस्था तथा ब्यापार कम्पनी लिमिटेडले अनुदानमा चामल बिक्री गर्ने गर्छ ।
धार्चेको माछाखोला र चुमनुब्रीको सिर्दिबासका डिपोबाट अनुदानको चामल बिक्री हुँदै आएको छ ।
नेपाल सरकारले सिर्दिबास डिपोका लागि तीन हजार पाँच सय र माछाखोला डिपोका लागि पाँचसय क्विलन्टल चामल यो वर्ष लैजाने योजना बनाएको थियो । तर अहिलेसम्म सिर्दिबास डिपोमा दुई हजार सात सय सात क्लिन्टल मात्र पठाइएको छ । यो मध्ये पनि करिब पाँच सय क्लिवन्ट डिपोमा पुगेको छैन । खाद्य ब्यवस्था तथा ब्यापार कम्पनी लिमिटेडका गोरखा शाखा प्रमुख नबिन बस्नेतले पछिल्लो पटक जेठ २६ गते कार्यालयले सदरमुकामबाट खाद्यान्न पठाएको बताए ।
डिपोमा अहिलेसम्म करिब दुई हजार एक सय क्विन्टल मात्रै पुगेको छ । अहिले सिर्दिबास डिपोमा करिब दुई सय क्लिवन्टल मात्रै चामल छ ।
माछाखोला डिपोमा पाँच सय क्विन्टल खाद्यान्न ढुवानी गर्नुपर्नेमा दुई सय क्विन्टल बाँकी छ । सदरमुकाम स्थित गोदामबाट चलानी भएको तीन सय मध्ये पनि एक सय भन्दा बढी अझै पुग्न बाँकी छ । यहाँ पाँच सात क्लिवन्टल मात्रै चामल बाँकी छ । ‘केही परिमाण त हामीले स्टक राख्नुपर्ने हुन्छ’ शाखा कार्यालय गोरखाका प्रमुख बस्नेतले भने ‘बाटो नहुँदा ढुवानी गर्न अहिले संभव भएन ।’ माछाखोलाका लागि चुमकाङ निर्माण सेवा र सिर्दिबासका लागि प्रगति निर्माण सेवाले खाद्यान्न ढुवानीको जिम्मा लिएका हुन् ।
निर्माण कम्पनीसँग असार मसान्तभित्र ढुवानी गर्ने सम्भौता छ ।
निषेधाज्ञा र बाटो देखाएर उनीहरुले ढुवानी गर्ने अवस्था छैन । हेलिकप्टरबाट ढुवानीकालागि गृह मन्त्रालय, खाद्य ब्यवस्था तथा ब्यापार कम्पनी लिमिटेडसँग समन्वय भईरहेको गोरखाका प्रमुख जिल्ला अधिकारी शालिग्राम शर्मा पौडेलले बताए । ‘बाटो नभएकाले त्यहाँ खाद्यान्न अभाव हुने भन्दै स्थानीयले गुनासो गर्नुभएको छ, हामीले बैकल्पिक तरिका अपनाउँदैछौँ’ प्रजिअले भने ।
सदरमुकामबाट धार्चेको माछाखोलासम्म सडक जोडिएको थियो । स्थानीय बजारमा चामल उपलब्ध हुन थालेपछि अनुदानको चामल कम प्रयोग गरेपछि कोटा घटाइएको हो । सिर्दिबास भने सडकले नजोडिएको हुँदा त्यहाँ अनुदानको चामल सस्तो पर्ने भएकाले उपभोग्ताको रोजाईमा पर्ने गरेको थियो ।
स्थानीय बजारमा पनि खाद्यान्न अभाव हुन थालेपछि हेलिकप्टबाट ढुवानी गर्नुको बिकल्प नभएको स्थानीय बताउँछन् । यस अघि भने उत्तरी गोरखामा खच्चडबाट खाद्यान्न ढुवानी गरिन्थ्यो । वर्षात निरन्तर भईरहेको र तत्काल सबै ठाउँमा एकैसाथ बाटो बनाउन सक्ने अवस्था नहुँदा समस्या भएको चुमनुब्री गाउँपालिकाका अध्यक्ष धनबहादुर गुरुङले बताए । ‘हामीले वर्षात रोकिएसँगै मर्मत गर्ने, वडा, स्थानीय समुहलाई मर्मतकालागि अनुरोध गरिरहेका छौँ’ उनले भने ।
