कांग्रेस नगर सभापति खत्रीद्धारा कोरोना संक्रमितको उपचारका लागि गाडी सहयोग
नेपाली कांग्रेसका गोरखा नगरसभापति चन्दनबाबु खत्रीले आफ्नो निजी गाडी कोभिड १९ बिरामीको उपचारमा प्रयोग गर्न गोरखा नगरपालिकालाई उपलब्ध गराएका छन् ।
गोरखामा पनि कोरोना संक्रमण दर बढेको र एम्बुलेन्स नपाएर बिरामीले उपचार पाउनबाट बञ्चित हुनुपर्ने अवस्था आउन नदिन आफुले गाडी उपलब्ध गराएको खत्रीले बताए ।
उनले बा १६ च २००१ नम्बरको गाडी बिहिवार गोरखा नगरपालिकाका नगरप्रमुख राजनराज पन्तलाई हस्तान्तरण गरेका हुन् ।
गोरखा नगरपालिकाको आफ्नो एम्बुलेन्स नभएका बेला कांग्रेस नगर समिति सभापतिले उपलब्ध गराएको गाडीले बिरामीको उपचारमा थप मद्धत पुग्ने नगरप्रमुख राजनराज पन्तले बताए ।
‘यो माहामारीको बेला सबै मिलेर काम गर्नुपर्छ, सबैको सहयोग आवश्यक छ’ उनले भने ‘म अन्य राजनीतिक दल, संघ संस्था र ब्यक्तिहरुलाई पनि सहयोगको अभियानमा जोडिन अनुरोध गर्दछु ।’ आफुले चढ्ने गाडी संक्रमितको उपचारका खातिर नगरपालिकालाई उपलब्ध गराएको प्रति उनले धन्यवाद ब्यक्त गरे ।
उक्त गाडी निषेधाज्ञा अवधी भर नगरपालिकाले कोरोना संक्रमितको उपचारका निम्ति प्रयोग गर्ने बताइएको छ ।
