| बिहिबार, साउन २२, २०७७

रमाईलोमै बित्छ क्वारेन्टिनको समय

दराैँदी समाचारदाताः शनिवार बिहान नौ बजे गोरखा नगरपालिकाले वडा नम्बर १० को मनकामना बहिरा माध्यमिक विद्यालयम सञ्चालन गरेको क्वारेन्टिनमा पुग्दा त्यहाँ बस्ने १७ जना लोकदोहोरी गीतको तालमा छमछमी नाच्दै थिए । उफरमा लोकदोहोरी गित घन्काउँदै नाच्दै गरेका उनीहरुलाई बेलाबेला नेपाली सेनाका टोलीले शारीरिक ब्यायम पनि सिकाउँथे । माथिल्लो आँगनमा बसेका स्वास्थ्यकर्मी र सेनाको निर्देशन अनुसार उनीहरुले शारीरिक व्यायम गरिरहेका थिए ।

बिहान करिब दुई घण्टा यो क्रम निरन्तर चलिरहने स्वास्थ्यकर्मी ज्योति श्रेष्ठले बताईन् । ‘छिनछिनमा हामीले केही समस्या भए भन्नुहोस् भनेर सोधिरहेका हुन्छौँ’ उनले भनिन् । मुख्य नाका मझुवा देउराली भएर जिल्ला भित्रनेहरु धेरै हुँदा मनकामना बहिरा माध्यमिक विद्यालयको क्वारेन्टिनमा बस्नेहरु धेरै छन् ।
अहिलेसम्म एक सय ३६ जना त्यहाँ बसिसकेका छन् । उनीहरुमध्य १० जना मात्र कोरोनाका कारण संक्रमित भए । त्यहाँ बसेकाहरुलाई दुई पटक पिसिआर गर्दा रिपोर्ट नेगेटिभ आएपछि घर पठाईन्छ । ‘एक सय १७ पुरुष र १९ जना महिला यहाँ बसिसक्नुभयो’ क्वारेन्टिमा खटिएकी स्वास्थ्यकर्मी ज्योती श्रेष्ठले भनिन् ‘अहिले १७ जना बाँकी हुनुहुन्छ ।’ बसेकाहरुमध्ये अधिकासं बिदेशबाट आउनेहरु छन् । भारतबाट ४९ जना, तेस्रो मुलकबाट २० जना र ६७ जना नेपाल भित्रकै जिल्लाबाट क्वारेन्टिन बसेका थिए ।

त्यहाँ रहेकालाई बिहान ब्यायम गराउने, खाजा, खाना दिने गरिन्छ । दिनभरि र साँझपनि क्वारेन्टिनमा बसेकाहरु इन्टरनेट चलाएर समय बिताउँछन् । रोजगारीको सिलसिलामा बिदेश गएका र कोरोनाको प्रभावले रोजगारी गुमाएकाहरु घर फर्किएका छन् । उनीहरु १४ दिन क्वारेन्टिनमा बसेर पिसिआर रिपोर्ट नेगेटिभ आएपछि मात्रै घर फर्किन्छन् । क्वारेन्टिन ब्यवस्थापन राम्रो हुँदा नेपाल फर्किसकेकाहरुले इन्टरनेटबाट कुराकानी गरेर सँगै काम बिहिन भएर बिदेश बसेकालाई पनि बोलाउन थालेको क्वारेन्टिन ब्यवस्थापनमा खटिएका कर्मचारी बताउँछन् ।

क्वारेन्टिन ब्यवस्थापनका लागि प्रदेश र संघिय सरकार कतैबाट रकम निकासा नहुँदा नगरपालिकाले आफैँ ब्यवस्थापन गरेको गोरखा नगरपालिकाका नगरप्रमुख राजनराज पन्तले बताए ।

‘स्वास्थ्यकर्मी, सुरक्षाकर्मीको सहायताले क्वारेन्टिन धेरै ब्यवस्थित बनाएका छौँ’ उनले भने ‘क्वारेन्टिनमा बस्दा तनाब नहोस् र समुदायले बिदेशबाट फर्केकाहरुलाई नराम्रो दृष्टिकोणले नहेरुन् भन्ने उद्देश्य हाम्रो हो ।’ क्वारेन्टिनमा बसेकाहरुलाई सम्झाउँदै उनले भने ‘बिदेशबाट फर्कनुभएकाहरु अब गाउँमै काम गर्ने योजना बनाउनुहोस् । बिदेशबाट फर्केकालाई गोरखा नगरपालिकाले कृषि, पशुपालन ब्यवशायमा प्रोत्साहन गर्नेछ ।’ क्वारेन्टिनमा बसेर फर्केकाहरुलाई कोरोना बारे सचेत भएर गाउँमा समेत सचेतना गराउन उनले सुझाब दिए ।

गोरखाका केही पालिकाका क्वारेन्टिन अहिले पनि आधारभुत सामग्री बिनाका छन् । इन्टरनेट सबैठाउँमा छैनन् । गोरखा नगरपालिकाले सञ्चालन गरेको क्वारेन्टिनबाट घर गएकाहरु पनि त्यहाँको ब्यवस्थापन र ब्यवाहार राम्रो भएको बताउँछन् ।

प्रतिक्रिया दिनुहोस्