अत्यावश्यकको नाममा अनाबश्यक गाडी कुद्न थालेपछि स्थानीयद्वारा सवारी चेकजाँच सुरु
लकडाउनका बेला अत्यावश्यकको नाममा अनाबश्यक सवारी साधन चल्न थालेपछि गोरखा नगरपालिका १० बाह्रकिलोका युवाहरुले सवारी चेकिङ गर्न थालेका छन् ।
कोरोना संक्रमितको संख्या बढ्दै गएका बेला पनि जथाभावी रुपमा सवारीसाधन चल्न नरोकिएपछि मंगलबारदेखि युवाहरुले सवारी चेकिङ गर्न थालेको स्थानीय युवा अमृत लामिछानेले जानकारी दिए । ‘बिरामी बोक्ने एम्बुलेन्सले बिरामी नबोकेर यात्रु बोक्ने गरेका छन् । अत्याबश्यक भनेर पास लिएर चलेका गाडी पनि पासमा उल्लेख गरेको भन्दा अनाबश्यक प्रयोजनमा कुदिरहेका छन्’, लामिछानेले भने, ‘त्यसैले कहीँ प्रशासनले पनि जथाभावी पास दिइरहेको छ कि, कहीँ प्रहरीले पनि िफितलो चेकजाँच गरिरहेको छ कि भनेर युवाहरु नै चेकजाँचमा आएका हौं ।’ बिहान ११ बजेदेखि सवारी चेकजाँच गर्न थालेको उनले बताए । चेकजाँच गर्दा एउटा एम्बुलेन्सले बिरामी नलिई सात जना यात्रु कोचाकोच गरेर बोकेर कुदिरहेको भेटेको उनले बताए ।
मंगलबार दिउसोसम्म अनाधिकृत रुपमा चलेका ११ वटा सवारी साधन फिर्ता गरेको स्थानीयबासीको भनाइ छ ।
लकडाउनको २२ दिनसम्म पनि गोरखाको सडकमा अनावश्यक रुपमा गाडी चल्ने क्रम जारी छ । पासको दुरुपयोग गर्ने क्रम बढेपछि प्रशासन कार्यालयले यो अवधिमा दुईफेर पुरानो पास रद्ध गरी नयाँ पास बनाइसकेको छ ।
जिल्ला प्रशासन कार्यालयले जारी गरेको पासको आधारमा सवारी चलाउनु पर्ने व्यवस्था भएपनि वडा कार्यालयको तथा बिभिन्न संघसंस्थाको पासको आधारमा पनि सवारी चलेको भेटिएको युवाहरुले बताएका छन् ।
