२० हजार बढीले मेलाको अवलोकन गरे, बिहीवार हालसम्मकै धेरै दर्शकको उपस्थिती
जिल्ला सदरमुकामको हरमटारी खेलमैदानमा जारी कृषि पर्यटन तथा व्यापार मेलाको हालसम्म २० हजार बढी दर्शकले अवलोकन गरिसकेका छन् । बिहीवार सबैभन्दा बढी पाँच हजार दर्शकले मेलाको अवलोकन गरेको आयोजक गोरखा चेम्वर अफ कमर्सका अध्यक्ष भाइचन्द्र श्रेष्ठले बताए ।
‘अरु दिन १७–१८ सयको हाराहारीमा दर्शक हुन्थे,’ उनले भने, ‘बिहीवार दर्शकको संख्या धेरै भयो, करिव पाँच हजारले अवलोकन गरे भन्ने अनुमान हाम्रो छ ।’ बिहीवार गायिका ज्योति मगर सहित प्रताप दास लगायतका कलाकारहरुको प्रस्तुती रहेको थियो । आज शुक्रवार दुर्गेश थापा, मञ्जु पौडेल, अनु अधिकारी, सरुना गोतामे दवाडी लगायतका गायक गायिकाको सांगितिक प्रस्तुती रहने कमर्सका अध्यक्ष श्रेष्ठले जानकारी दिए ।
यही पुस १९ गतेबाट मेला शुरु भएको हो । २९ गतेसम्म मेला संचालन हुने भनेपनि तीन दिनका लागी थप गरिएको उनले बताए । ‘हिजोसम्म मेलाको स्टलहरुमा व्यापार खासै भएन, त्यसैले माघ ३ गतेसम्म मेलाको समय थप गर्ने निर्णय गरेका हौ,’ उनले भने । माघे संक्रान्तिको दिन मगर समुदायको कार्यक्रम सोही स्टेजमा संचालन हुने र उनीहरुको कार्यक्रम सम्पन्न भएपश्चात पुन मेलाका कार्यक्रमले निरन्तरता पाउने बताइएको छ । सो दिन तीन बजेसम्म निशुल्क मैदान प्रवेश गर्न पाइने र त्यसपछि भने टिकट शुल्क लाग्ने मेला आयोजक गोरखा चेम्वरले जनाएको छ ।
