रसुवा बाढी पीडितलाई धार्चेको तर्फबाट रु १५ लाख रुपैयाँ राहत
धार्चे गाउँपालिकाले गत भदौ १० गतेको बाढीका पीडितलाई राहत तथा पुनस्थापनाका लागि १५ लाख रुपैयाँ दिने निर्णय गरेको छ । यही भदौ २२ गतेको कार्यपालिकाको बैठकले रसुवा बाढी पीडितलाई १५ लाख रुपैयाँ राहत दिने निर्णय गरेको पालिका अध्यक्ष लक्ष्मण गुरुङले जानकारी दिए ।
जनप्रतिनिधि, कर्मचारीहरु र शिक्षकहरुबाट संकलित पन्ध्र लाख रुपैयाँमध्य सो बाढीमा परी बेपत्ता भएका धार्चेका चार जनाको परिवारलाई प्रतिपरिवार ५० हजार रुपैयाँका दरले उपलब्ध गराउने पनि निर्णय भएको छ । साथै यथासम्भव कोशिस गर्दा पनि फेला नपरेमा परम्पराअनुसार काजकिरिया गर्न परिवारलाई किरिया खर्च र राहतस्वरुप प्रतिपरिवार फेरि पनि पचास हजार रुपैयाँका दरले उपलब्ध गराउने निर्णय भएको पालिका अध्यक्ष गुरुङले जानकारी दिए ।
बाँकी रकम धार्चे गाउँपालिकाको तर्फबाट रसुवा बाढी पीडितका लागि प्रधानमन्त्री राहत कोषमा जम्मा गर्ने निर्णय गरिएको उनले जानकारी दिए ।
