बिपन्न १४ घर परिवारलाई असल छिमेकीद्वारा घर निर्माण सामग्री सहयोग
असल छिमेकी नेपालले बिपन्न १४ घर परिवारलाई दुई लाख रुपैयाँ भन्दाबढिको घर निर्माण सामग्री सहयोग गरेको छ ।
गोरखा नगरपालिका, सिरानचोक गाउँपालिका र बन्दिपुर गाउँपालिकामा उक्त सामग्री बितरण गरिएको असल छिमेकी नेपालका बरिष्ठ योजना अनुगमन तथा मूल्याङ्कन अधिकृत दिनेश केसीले बताए ।
बाढी पहिरोका कारण आफ्नो बासस्थान गुमाएकाहरुलाई असल छिमेकी नेपालले सहयोग गरेको जनाएको छ ।
सिरानचोक गाउँपालिका ७ मा पहिरोबाट प्रभावित तीन घरधुरीलाई प्रतिघर २४ थान रङ्गीन जस्तापाता, तीन किलो काँटी, दुई पाता प्लेनपत्ता बितरण गरिएको उनले बताए । वडा प्रतिनिधि कुमार गुरुङको उपस्थितिमा राहत बितरण गरिएको हो ।
गोरखा नगरपालिका वडा नम्बर ९ मा पूर्णबहादुर सिर्मलको घर पुननिर्माण गर्न ३२ थान जस्तापाता, चार किलो काँटी र दुई थान प्लेनपत्ता सहयोग गरिएको बरिष्ठ योजना अनुगमन तथा मूल्याङ्कन अधिकृत केसीले बताए । वडा अध्यक्ष कुलबहादुर कुँवरको उपस्थितिमा राहत बितरण गरिएको असल छिमेकी नेपालले जनाएको छ ।
बन्दिपुर गाउँपालिका अध्यक्ष पूर्णसिंह थापाको प्रमुख आतिथ्यतामा वडा अध्यक्ष, प्रतिनिधिहरुको उपस्थितिमा वडा नम्बर १ र ३ का १० घर चेपाङ परिवारलाई जस्तापाता, काँटी र प्लेनपत्ता सहयोग गरिएको अधिकृत केसीले जानकारी दिए । स्थानीय तहसँगको समन्वयमा असल छिमेकीले उक्त सामग्री बितरण गरेको जनाएको छ ।
भुकम्पपछिको पुन निर्माण, कोरोना उपचार, रोकथाम र नियन्त्रण सँगै बिपत्तिका समयमा पनि असल छिमेकी नेपालले स्थानीय तहसँगको सक्रियतामा बिभिन्न खालका कार्यक्रम संचालन गर्दै आएको छ ।
