‘जुठे’ र ‘हल्का रमाईलो’ टिमद्वारा गण्डकी गाउँपालिकाको चेपाङ समुदायलाई खाद्यान्न सहयोग
टेलिसिरियल ‘हल्का रमाईलो’ र ‘जुठे’ टीमले गोरखा जिल्लामा ६६ घरपरिवारलाई राहत वितरण गरेको छ ।
यो टीमले गोरखा गण्डकी गाउँपालिका –१ बुटारका परियार र सुनार ५० घरपरिवार तथा चेपाङ, नेवार र गुरुङ १६ घरपरिवारलाई राहत वितरण गरेको हो ।
टेलिसिरियलका लेखक/निर्देशक तथा कलाकार मरिचमान श्रेष्ठ, राजु पौडल लगायत अन्य कलाकारहरु त्यहाँ पुगी राहत वितरण गरेका हुन् । श्रेष्ठ गोरखाको बारपाक सुलिकोट गाउँपालिका कै हुन् ।
गृह जिल्लामा कोरोना बिपत्तीको बेला सहयोग गर्न पाउँदा खुसी लागेको उनले बताए ।
दैनिक ज्यालामजदुरी गरी बिहान–बेलुकाको छाक टार्दै आएका परिवार निषेधाज्ञाका कारण समस्यामा परेको हुनाले उनीहरुलाई राहत वितरण गरिएको मरिचमान श्रेष्ठले जानकारी दिए ।
उनले गाउँपालिका अध्यक्ष होमबहादुर रानासँग समन्वय गरेर वडामा राहत वितरण गरिएको जानकारी दिए ।
यो टीमले झण्डै डेढ लाख रुपैयाँ बराबरको खाद्यान्न वितरण गरेको हो । उनीहरुलाई दैनिक उपभोग्य सामाग्री चामल, नुन, तेल, दाल वितरण गरिएको थियो ।
आफूहरुले अन्य व्यक्ति वा संस्थाबाट उठाएको रकमबाट सहयोग नगरेको समेत मरिचमानले बताए । मरिचमान अन्य समयमा पनि सामाजिक काममा सक्रिय रहँदै आएका छन् । यस अघि भुकम्प लगत्तै उनले गोरखाका विद्यालयमा पुगेर विद्यार्थीलाई त्रास हटाउन प्रहशनका कार्यक्रम पनि संचालन गरेका थिए ।
‘जुठे’ हिमालय टेलिभिजनमा हरेक बुधबार साँझ ८ बजे प्रशारण हुँदै आएको छ भने ‘हल्का रमाईलो’ नेपाल टेलिभिजनमा हरेक आईतबार प्रशारण हुँदै आएको छ । निषेधाज्ञामा पनि यी टेलिसिरियल नियमित प्रशारणमा छन् ।
