| बुधबार, कार्तिक २७, २०७६

गोरखाको प्रहरीद्वारा अवैध सालको काठ बरामद

 

गोरखा नगरपालिका १० छेबेटारको सानो बगैंचाबाट अबैध काठ बरामद गरिएको छ । गोप्य सुचनाका आधारमा विहिबार खटिएको जिल्ला प्रहरी कार्यालय गोरखाको टोलीले २० थान सालको काठ बरामद गरेको हो । काठ कुन प्रयोजनका लागि कसले राखेको भन्ने पत्ता लाग्न सकेको छैन ।

थप अनुसन्धान तथा कारबाहीको लागी प्रहरीको टोलीले जिल्ला वन कार्यालयमा काठ बुझाएको एसपि ओमप्रकाश अधिकारीले जानकारी दिए । बजार मुल्य अनुसार करीब डेढ लाख रुपैयाँ बराबरका काठ बरामद भएको डिभिजन वन कार्यालयका सहायक वन अधिकृत महेश पौडेलले बताए ।

४५.४५ क्युफिट रहेको ति काठ सि ग्रेडका रहेका उनको भनाई छ । बरामद गरिएको काठका सन्दर्भमा थप अनुसन्धान गर्न डिभिजन वन कार्यालयले गोरखकाली सब डिभिजन वन कार्यालय १२ किलोलाई पत्राचार गरेको छ । अनुसन्धानका आधारमा थप कारबाही प्रक्रिया अघि बढ्ने सहायक वन अधिकृत पौडेलले जानकारी दिए ।

यसैबिच, गोरखा नगरपालिका ८ को रानीवनका विभिन्न ठाउँमा गाँजा फडानी गरिएको छ । समुदाय प्रहरी साझेदारी कार्यक्रम अन्तर्गत जिल्ला प्रहरी कार्यालय गोरखाको अगुवाई र स्थानीय बासीन्दाको सहयोगमा गाँजा फडानी गरिएको हो । प्राकृतिक रुपमा उम्रिएको करीब चार सय बोट गाँजा फडानी गरी नष्ट गरेको जिल्ला प्रहरी कार्यालय गोरखाले जनाएको छ ।

प्रतिक्रिया दिनुहोस्