वैदेशिक रोजगारी ठगी आरोपमा गोरखाका रमेश धमलासहित तीनजना पक्राउ
वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा प्रहरीले गोरखाका रमेश धमलासहित तीनजनालाई पक्राउ गरेको छ । गोरखा आरूघाट गाउँपालिका ५ घर भई काठमाडौं तारकेश्वर नगरपालिका ४ बस्ने ३१ वर्षीय धमलालाई काठमाडौं महानगरपालिका २६ बाट मंगलबार पक्राउ गरेको प्रहरीले जनाएको छ ।
सर्विया पठाइदिन्छु भन्दै १ जना पीडितबाट ७ लाख ५० हजार रूपैयाँ लिई सम्पर्कविहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनलाई पक्राउ गरेको हो । त्यसैगरी गेट्सबाई इन्टरनेशनल कन्सलटेन्सीका प्रमुख कार्यकारी अधिकृत महालक्ष्मी नगरपालिका ७ ललितपुर बस्ने २९ वर्षीय प्रतिक बुढाथोकी, ललितपुर महानगरपालिका २ बस्ने महालक्ष्मी नगरपालिका १० घर भएका ३९ वर्षीय सन्त बहादुर लामालाई पनि प्रहरीले पक्राउ गरेको छ ।
जापान पठाइदिन्छु भन्दै ११५ जना पीडितहरूबाट २ करोड ८० लाख रूपैयाँ ठगी गरेको प्रतिक बुढाथोकीमाथि आरोप छ । त्यस्तै मलेसिया पठाइदिन्छु भन्दै १ जना पीडितबाट २ लाख रूपैयाँ ठगी गरेको सन्त बहादुरमाथि आरोप छ । प्रतिकलाई सोमबार रूपन्देही बुटवलबाट र सन्त बहादुरलाई ललितपुर महालक्ष्मी नगरपालिका १० बाट पक्राउ गरेको हो ।
उनीहरूलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको छ ।
