दुर्गम बस्तीका घरघरमा पुगेर घटना दर्ता गर्दै धार्चे
जिल्लाको दुर्गममा अवस्थित धार्चे गाउँपालिकाले विभिन्न कारणले व्यक्तिगत घटना दर्ता गर्न छुटेकाहरुलाई लक्षित गरी टोलटोल, घरघरमा पुगेर घटना दर्ता गरेको छ । कसैले पनि राज्यको सेवा सुविधाबाट वञ्चित हुनु नपरोस् भन्ने उद्देश्यले घरघरमै पुगेर घटना दर्ता गरेको गाउँपालिकाका अध्यक्ष लक्ष्मण गुरुङले जानकारी दिए ।
गत जेठको २६ गतेबाट असार १८ गतेसम्म घटना दर्ता घुम्ती शिविर सञ्चालन गरिएको अध्यक्ष गुरुङले जानकारी दिए ।
पालिकाको पञ्जिकरण शाखाले सञ्चालन गरेको घटना दर्ता शिविरमा अहिलेसम्म ६५ जनाभन्दा धेरैको घटना दर्ता गरिएको छ । वडा नं. २ का २६ जना, वडा नं. ६ का २४ जनाको घटना दर्ता गरेको छ । वडा नं. ४ मा पाँचजना र वडा नं. ४ का विभिन्न टोलमा घुम्ति शिविर सञ्चालन गरी १० जनाभन्दा धेरैको व्यक्तिगत घटना दर्ता भइरहेको पञ्जिकरण शाखाका दीपेन्द्र गुरुङले जानकारी दिए ।
धार्चेमा कतिपय टोलबाट वडा कार्यालय पुग्न पनि चार, पाँचघण्टासम्म पैदल हिड्नु पर्ने वाध्यता छ । ‘कुनै वडामाचाहिँ एक वडा एक गाउँ छ । कुनै वडामाचाहिँ चार, पाँच वटा टोल पनि छन् । एउटा टोलबाट वडा कार्यालय पुग्न तीन, चारघण्टासम्म लाग्छ’, गुरुङ भन्छन्, ‘त्यस्ता टोलका वृद्धवृद्धा, अपांग, बिरामी सेवाग्राहीहरु सामाजिक सुरक्षा भत्ताको नवीकरण गर्न वडा कार्यालय पुग्न सक्दैनन् । अनि सेवाबाट वञ्चित हुन पुग्छन् । त्यस्तै टाढा भएकै कारण जन्मदर्ता, मृत्यूदर्ता, विवाह दर्ता गर्न पनि आलटाल भइरहेको हुनसक्छ ।’
यी सबै अवस्थालाई मध्यनजर गरी शाखाले घटना दर्ता घुम्तिशिविर सञ्चालन गरेको उहाँले बताउनुभयो । घुम्ती शिविरमा हिँड्ने पञ्जिकरण शाखाका कर्मचारीले वायोमेट्रिक मेसिन, आइरिस उपकरण, ल्यापटप, प्रिण्टर तथा फारामहरु बोकेर घरघरमा हिँडिरहेका छन् ।
सात वटा वडा रहेको सो पालिकाको बुधबारसम्म वडा नं. २, ४, ५ र ६ को व्यक्तिगत घटना दर्ता कार्यक्रम सकिएको छ । समयमै घटना दर्ताको दर बढाउन तथा जनसंख्या र तथ्यांक अद्यावधिक गर्न शिविर उपलव्धीमुलक हुने गाउँपालिकाका अध्यक्ष लक्ष्मण गुरुङले जानकारी दिए ।
