नौली खोला मोटरेबल पुलले ल्याएको खुशी
गण्डकी प्रदेश सरकारको भौतिक पूर्वाधार तथा यातायात मन्त्रालयलेगोरखाको दुर्गम धार्चे गाउँपालिकाको केन्द्र माछाखोला हुँदै उत्तरी गोरखाका विभिन्न गाउ्रँबस्ती पुग्ने मोटरेबल पुल निर्माण गरेको छ । धार्चे ७ नौलीखोलामा चार करोड ३४ लाख लागतमा ३५ मिटर लामो, ८.४० मिटर फराकिलो पुल निर्माण गरेको हो ।
सो पुल २०८१ साउन २२ गते निर्माण सम्पन्न भइसक्नुपर्ने थियो, तर निर्धारित समयमा काम नभएपछि सरकारले २०८३ साउन २२ गतेसम्मका लागि पुनः म्याद थप गरेको थियो । त्यतिबेला पनि पुल नबनेपछि पुनः थपिएको समयमा पुल निर्माण सम्पन्न भएको हो । सो पुल निर्माण भएपछि अब उत्तरी गोरखा जाने सडक बाह्रै महिनाका लागि खुल्ला हुनेभएको छ । यसअघि सो ठाउँबाट सवारी साधन पार गर्न नसक्दा यात्रुहरु त्यहाँ ओर्लेर खोला तरेर पुनः पारिपट्टि अर्को गाडी परिवर्तन गरेर जान बाध्य थिए । सामान पनि बोकेर पारि तार्नुपर्ने बाध्यता थियो ।
अब यहाँ पुल बनेपछि तातोपानीसम्म हिउँद बर्खै सवारी साधन पुग्न सक्ने भएको छ । अब बर्खाका बेला पनि उत्तरी गोरखा जानेआउनेलाई सजिलो हुने भयो भने खाद्यान्न लगायतका सामान लैजान पनि सजिलो हुने भयो । दोभाननेरको ठूलो खोला, कालोभीर क्षेत्रको पहिरोले अबरोध गर्न सक्छ, तर तातोपानीसम्म यातायातका साधन चल्ने भएको छ ।
यसले गर्दा स्थानीयबासी खुशी भएका छन् ।
यसअघि माछाखोलामा पनि नेपाली सेनाले बेलीब्रिज निर्माण गरिसकेको छ । खोर्लाबेशीस्थित निम्रुङखोलामा पनि बुढीगण्डकी जलविद्युत आयोजनाले बेलिब्रिज निर्माण गरिसकेको छ । अब केही समस्या फुङ्गी खोलामा र दोभाननेरको खोलामा हुनसक्छ । अब पालिका तथा प्रदेशसभा तथा प्रतिनिधिसभा सदस्यहरुले यी ठाउँका समस्या समाधानका लागि पहल गर्नुपर्दछ ।
