गोरखामा चक्रे मिलनसहित १९ उमेदवारको जमानत जफत
हालै सम्पन्न प्रतिनिधिसभा सदस्य निर्वाचनमा गोरखामा चक्रे मिलनसहित १९ जना उमेदवारको जमानत जफत भएको छ । दुई वटा निर्वाचन क्षेत्र रहेको जिल्लामा उनीसहित कुल २५ जनाले उमेदवारी दिएका थिए । खसेको सदर मतको दश प्रतिशत ल्याउन नसक्दा जमानत जफत भएको जिल्ला निर्वाचन कार्यालयले जनाएको छ । गोरखा–२ मा कुल ५७ हजार १५६ मत खसेको थियो । जसमा ५४ हजार १४७ सदर मत छन् । जमानत जोगाउन करिव ५ हजार ४१५ मत ल्याउनुपर्ने भएपनि चक्रे मिलनले ३ हजार ८७ मत मात्र प्राप्त गरे ।
उनी एमालेबाट चुनाव लडेका थिए । त्यस्तै उज्यालो नेपाल पार्टीका बलराम तामाङले ६३९, राप्रपाका कुलबहादुर बस्नेतले २९२, मंगोल नेशनल अर्गनाइजेसनका सोमबहादुर गुरुङले २९०, नेपाल कम्युनिष्ट पार्टी (माओवादी) का टेकबहादुर प्रधानले १३०, नेशनल रिपब्लिक नेपालका प्रसाद गुरुङले १११, स्वतन्त्र उमेदवार चुडाप्रसाद ढकालले ८०, आम जनता पार्टीकी कल्पना कुमालले ४१, नेपाल मजदुर किसान पार्टीका रामशरण बुढाथोकीले ३० र स्वतन्त्र उमेदवार हरि पोखरेलले १४ मत प्राप्त गरेका छन् ।
दश प्रतिशत नआएकै कारण उनीहरुको पनि जमानत जफत भएको हो । सो क्षेत्रबाट कुल १३ जनाको उमेदवारी परेको थियो ।
यता १२ जना उमेदवार रहेको गोरखा–१ मा दश जनाको जमानत जफत भएको छ ।
एमालेका रामचन्द्र लामिछाने (३७३२), उज्यालो नेपाल पार्टीका रामकाजी राना मगर (४८९), राप्रपाका केदारमणी खनाल (३१०), संयुक्त नागरिक पार्टीका जितबहादुर घले (१६५), मंगोल नेशनल अर्गनाइजेसनका देवबहादुर थापा (१४२), नेपाल कम्युनिष्ट पार्टी (माओवादी) का बिष्णुप्रसाद रिजाल (५७), नेशनल रिपब्लिक नेपालका आकाश राना मगर (३५), स्वतन्त्र उमेदवार कविता भट्टराई (२३) र नेपाल मजदुर किसान पार्टीकी मनुकुमारी श्रेष्ठ (१९) को जमानत जफत भएको हो ।
कुल सदर मतको दश प्रतिशत नपुगेका कारण उनीहरुको जमानत जफत भएको हो । सो क्षेत्रमा कुल ६३ हजार ६०९ मत खसेको थियो । जसमध्ये ६१ हजार ३९० सदर थिए । जमानत जोगाउनका लागि ६ हजार १३९ मत ल्याउनुपर्ने थियो ।
