उत्तरी गोरखामा फस्टाएको किवी
गोर्खाको उत्तरी भेग यामगाउँमा सुरु भएको व्यावसायिक किवी खेतीले नेपालभित्रै रहेका सम्भावनालाई उजागर गरेको छ। लामो समयसम्म प्रयोगविहीन रहेको जमिनलाई उत्पादनशील बनाउँदै यस खेतीले स्थानीयस्तरमा आम्दानी र रोजगारी सिर्जना गरेको छ। यसले कृषि नै आर्थिक समृद्धिको बलियो आधार बन्न सक्छ भन्ने तथ्यलाई पुष्टि गरेको छ।
नेपालको भौगोलिक विविधता, अनुकूल मौसम र मेहनती जनशक्ति कृषि उद्यमका लागि उपयुक्त छन्। आधुनिक प्रविधि, सहज बजार पहुँच र नीतिगत सहयोग उपलब्ध गराउन सकेमा किवी खेतीजस्ता उच्च मूल्यका कृषि व्यवसायले ग्रामीण अर्थतन्त्रलाई सुदृढ बनाउन सक्छन्। यसले युवालाई विदेश पलायनको सट्टा स्वदेशमै उद्यमशील बन्न प्रेरित गरेको छ।
उत्तरी गोरखामा फस्टाएको किवी खेती एउटा स्थानीय सफलतामात्र होइन, यो समग्र नेपालका लागि आशा, सम्भावना र आत्मनिर्भरताको स्पष्ट संकेत हो।
