सदरमुकामका सात विद्यालयका ७८ विद्यार्थीलाई गडहेड्सद्वारा सहयोग
गोरखा जिल्ला शिक्षा तथा स्वास्थ्य विकास परियोजना(गडहेड्स)ले गोरखा सदरमुकामका सात विद्यालयमा अध्ययनरत ७८ जना विद्यार्थीलाई पोशाक तथा स्टेशनरी सामग्री प्रदान गरेको छ ।
सोमबार बालमन्दिर माविमा आयोजित एक समारोहका बीच सो संस्थाले बालमन्दिर मावि, महेन्द्रज्योति मावि, शक्ति मावि, रत्नलक्ष्मी मावि, नवज्योति मावि, गोरखकाली आधारभूत र मनकामना बहिरा माविका ७८ जना विद्यार्थीलाई पोशाक तथा स्टेशनरी सामग्री वितरण गरेको हो ।
सहयोगी सामग्रीमा पोशाक, जुत्ता, मोजा, झोला, कापी, कलम, ज्यामिती बाकसलगायतका सामग्री रहेका छन् । साथै महेन्द्रज्योति माविमा कक्षा ११ र १२ मा अध्ययनरत चार जनालाई सात हजार रुपैयाँका दरले नगद पनि वितरण गरिएको संस्थाका अध्यक्ष लक्ष्मणबाबु आचार्यले जानकारी दिए ।
अब निकट भविष्यमै दुल्लभ मावि घ्याम्पेशाल, शान्ति मावि बगुवा, द्रव्यशाह क्याम्पस, हिमालय मावि बारपाक, ज्ञानज्योति मावि लप्सीबोट र संसारी महेन्द्र मावि नयाँसाँगुका विद्यार्थीलाई पनि सहयोगी सामग्री वितरण गर्ने कार्यक्रम रहेको अध्यक्ष आचार्यले बताए । सो कार्यक्रम अन्तर्गत द्रव्यशाह क्याम्पसमा पढ्ने पाँचजनालाई १२ हजार रुपैयाँका दरले नगद बितरण गर्ने कार्यक्रम रहेको अध्यक्ष आचार्यले जानकारी दिए ।
