गण्डकी प्रदेश फुटबल संघको अध्यक्षमा दीपेन्द्र श्रेष्ठ चयन, गोरखा र कास्कीद्वारा बहिष्कार
गण्डकी प्रदेशको फुटबल संघको अध्यक्षमा दीपेन्द्र श्रेष्ठ चयन भएका छन् । शनिबार गोरखा सदरमुकाममा आयोजित संघको दोस्रो अधिवेशनबाट श्रेष्ठको अध्यक्षतामा नयाँ कार्यसमिति चयन गरिएको हो ।
अधिवेशनबाट संघको उपाध्यक्षमा मिलन गुरुङ, तारा बहादुर गुरुङ, जय राजभण्डारी चयन भएका छन् । समितिको सदस्यहरुमा थमबहादुर गुरुङ, भिजन श्रेष्ठ, कुसुमराज बराल, शोभाकुमारी आले, अमृत भण्डारी, सन्दिप पन्थी, निपेद्र श्रेष्ठ, इन्द्र सुब्बा राना, विकास थापा, अमर गुरुङ र खुम बहादुर थापा चयन भएका छन् ।
नयाँ कार्य समितिको पहिलो वैठकले गण्डकी प्रदेश फुटबल संघको वरिष्ठ उपाध्यक्षमा मिलन गुरुङ, मानार्थ उपाध्यक्षमा जगतबहादुर थापा, महासचिवमा विनोद गुरुङ, कोषाध्यक्षमा डिलकुमारी घिमिरे, सहायक महासचिवमा सुमन गुरुङ, लक्षमण कार्की, प्रकाश रेग्मी र सहकोषाध्यक्षमा दिनेश केसीलाई मनोनित गरेको जनाएको छ ।
संघका पूर्व अध्यक्ष लोकेन्द्र गुरुङको अध्यक्षता गण्डकी प्रदेश खेलकुद परिषदका सदस्य सचिव श्रीधर शर्माको प्रमुख आतिथ्यतामा भएको कार्यक्रममा अखिल नेपाल फुटबल संघ वरिष्ठ उपाध्यक्ष वीरबहादुर खड्का, गण्डकी प्रदेश खेलकुद परिषदका सदस्य ऋषिराम गौतम, अखिल नेपाल फुटबल संघका पूर्व महासचिव इन्द्रमान तुलाधर लगायतको उपस्थितिमा कार्यक्रम सम्पन्न भएको हो ।
संघमा आबद्ध रहेका आठ जिल्ला मध्ये गोरखा र कास्कीले कार्यक्रम बहिष्कार गरेको जनाएको छ । गोरखाको होटल इनमा कार्यक्रम संचालन भइरहेको बेला अखिल नेपाल फुटबल संघ गोरखाका अध्यक्ष विशाल गुरुङले भने कार्यक्रम बहिष्कारको घोषणा गरेका थिए ।
गोरखामा भएको कार्यक्रममा प्रदेशले आफुहरुले कार्यक्रमको कुनै जानकारी नगराएको गुरुङले बताए । गण्डकी फुटबल संघले गोरखा र कास्कीलाई एक्ल्याएर उनीहरु एकल ढंङगले अघि बढ्न खोजेको उनको आरोप छ । उनीसँगै कास्कीले पनि कार्यक्रम बहिष्कार गरेको जनाएको छ ।
