महशुल तिरेर पर्याप्त पानी प्रयोग गर्न पनि पाइँदैन
दोषजति हामी अरुतिर अझै सरकारतिर देखाउँछौँ किनभने सरकार, राज्य भनेपछि त्यो अमुक हुन्छ, जति सत्तो सराप गरे पनि हुन्छ भन्ने हाम्रो मानसिकता छ । आफूले गरेको कार्यसम्पादन कत्तिको सेवाग्राहीमैत्री छ भन्नेतिर हाम्रो चिन्तन, मनन नै छैन । आफूमैत्री भएपछि सबैमैत्री छ भन्ठान्ने हामीमा भ्रम छ । पुस्तौँदेखि चलिआएको, हामीले अपनाउँदै आएको व्यवस्था पुनरावलोकन गर्नुपर्ने पो छ कि भन्नेतिर हामी सचेत पनि छैनौँ, कसैले औँल्याइदियो भने पनि हामी उनीहरुको सुझावमा कन्भिन्स नै हुन्नौँ ।
कर्णेखोला, तीनचापे, छहरेधारा लगायतका खानेपानी उपभोक्ता समितिमा पनि समस्या होलान् । विशेषतः धेरै उपभोक्ता भएको र सदरमुकाम बजारमा पानी वितरण गर्ने भएकाले पृथ्वीनारायण साना सहरी खानेपानी योजनाको चर्चा अल्लि बढि हुने गर्छ । यी सबै लोकल संस्थाहरुलाई समेटेर दरौँदी वृहत लिफ्टिङ आयोजना सञ्चालन भयो । सो आयोजनाले गोरखा नगरपालिका २, ३, ४, ५, ६, ७, ८ का आंशिक तथा पूर्ण भूभागमा पानी वितरण गर्ने लक्ष्य राखेर काम धन्नैधन्नै सम्पन्न गर्ने अबस्थामा छ । यी विभिन्न वडामा २२ वटा सदस्य संस्थाहरु छन् । जसमध्य हाल सातवटा सदस्य संस्थाहरुले पानी पाउने अबस्था छ ।
वडा नं. ६, ७ र ८ का विभिन्न टोलहरुमा पानी वितरण गरिरहेको पृथ्वीनारायण साना सहरी खानेपानी योजनाले अहिले पानी वितरण त गरिरहेको छ, तर पर्याप्त गरेको छैन । यो आयोजना सुरु हुँदा आयोजनाले जोडेको धारामा २४सै घण्टा पानी आउने भनिएको थियो, तर अहिले हप्तामा दुईफेर एकाधघण्टा मात्र पानी दिनेगर्छ । यसैलाई फारो गरी(गरी पानीको उपभोग गर्नुपर्ने अबस्था छ ।
यता उपभोक्ताले आवश्यकता अनुसारको पानी प्रयोग गर्न पाएका छैनन्, यता दरौँदी लिफ्टिङले क्षमताअनुसारको पानी वितरण गर्न पाएको छैन । बिचौलियाका रुपमा बीचमा रहेका खानेपानीका सदस्य संस्थाहरुले आफ्नो तजबीजले १० बर्षअघि जसरी पानी वितरण गर्थे, अहिले पनि त्यसमा परिवर्तन गरेका छैनन् । खपत गरेको पानीको महशुल तिर्ने उपभोक्ताले हो, मागअनुसारको पानी उपलब्ध गराउने दरौँदी लिफ्टिङले हो । बीचमा सदस्य संस्थाहरुले अवरोध गर्नुको कुनै उचित कारण छैन । उपभोक्ताले महशुल तिरेर पर्याप्त पानीको प्रयोग गर्न पाउनुपर्छ ।
