गोरखा नगरपालिकाको नीति तथा कार्यक्रम : नक्सा निशुल्क बनाईदिने, गाईभैँसीलाई सुत्केरी भत्ता
गोरखा नगरपालिकाको १० औँ नगरसभा शुक्रवार सम्पन्न भएको छ । सभाले केही नयाँ नीति र कार्यक्रम पारित गरेको छ भने अधिकासं निरन्तरता दिएको छ ।
गोरखा नगरपालिका भित्र अब बन्ने घरको नगरपालिकाले निशुल्क नक्सा बनाईदिने नीति लिएको छ । यस्तै सुत्केरी गाई भैसीका लागि सुत्केरी प्रोत्साहन भत्ताको पनि ब्यवस्था गर्ने मेयर कृष्ण बहादुर राना मगरले ११ औँ नगर सभामा जानकारी गराए ।
निजी क्षेत्र सँगको सहकार्यमा दुग्ध डेरी स्थापना गर्ने, दरौँदी नदी आसपासको क्षेत्रमा मत्स्य पकेट ब्लक तथा जोन कार्यक्रम संचालन गर्ने, ठुला लगानीमा आधुनिक रुपमा संचालित कृषि फर्महरु संरचना निर्माणमा प्राविधिक सहयोग र पूर्वाधार निर्माणमा सहुलियतको ब्यवस्था गर्ने नीति गोरखा नगरपालिकाले लिएको छ ।
गोरखा बजारको ठुलो आँगन क्षेत्रमा सम्पदा बस्ती निर्माणका लागि पहल गर्ने, खोलखोले–उत्तिसघारीमा ताल बनाउन संभाब्यता अध्ययन गर्ने, रानीबन कुहिरेभिर क्षेत्रमा प्राकृतिक ‘मिनी जु’ निर्माणका लागि पहल गर्ने मेयर राना मगरले बताए ।
गर्भवतीहरुलाई स्वास्थ्य संस्थामा सुत्केरी गराउनका लागि अन्तिम पटकको जाँचपछि टेलिफोन मार्फत स्वास्थ्य अवस्थाको जानकारी लिने ब्यवस्था गर्ने, अतिविपन्न सुत्केरी महिला तथा नवजात शिशुको लागि तीन महिना सम्म मासिक पाँच हजारका दरले ‘शिशु पोषण तथा सुत्केरी स्याहार खर्च’ उपलब्ध गराउने स्वास्थ्य नीतिमा उल्लेख छ ।
दरौँदी नदीमा जल तथा मौषम बिभागको सहकार्यमा मौषम पूर्वानुमान प्रणाली जडान गरिने, प्रकोपका कारणले ज्यान गुमाएकाको परिवारलाई २५ हजार र घर क्षती भएका परिवारलाई १५ हजार उपलब्ध गराउँदै आएको कार्यक्रमलाई निरन्तरता दिइने भएको छ ।
एक वडा एक खेलमैदान निर्माण गर्ने, वडा नम्बर १० छेवेटारलाई अन्तराष्ट्रिय स्तरको बनाउन संघ, प्रदेश सरकार सँग समन्वय गर्ने, युवाद्वारा संचालित ब्यक्तिगत तथा सामुयिक फार्मलाई अनुदान दिने नीति तथा कार्यक्रममा उल्लेख छ ।
गोरखाको पहिचानका लागि भिमसेन थापा र बिसे नगर्जी अभियान कार्यक्रमलाई निरन्तरता दिने, जनता सँग नगरप्रमुख कार्यक्रम संचालन गर्ने, बिपन्न परिवारलाई काजक्रिया खर्च उपलब्ध गराउने कार्यक्रम नगरप्रमुख कृष्णबहादुर राना मगरले १० औँ नगर सभामा प्रस्तुत गरेका छन् ।
उद्यमी महिलाका लागि जिविकोपार्जन सुधार कार्यक्रम अन्तरगत अनुदानको ब्यवस्था, घरेलु हिंसा न्यूनिकरण गर्न सबै वडामा अभिमुखिकरण कार्यक्रम, नगरपालिकामा सुविधा सम्पन्न सेफ हाउस निर्माण, पुराना कला र सिपको संरक्षण, जेष्ठ नागरिक दिवा सेवा केन्द्रको संस्थागत बिकास, एक वडा एक गौरवको आयोजना निर्माण गर्ने नीति नगरपालिकाले १० औँ नगरसभाबाट लिएको छ । नयाँ ट्रयाक खोल्ने सडक भन्दा पुराना सडकको स्तरोन्नती गर्ने नीति लिईने, गोरखा गेटमा पृथ्वीनारायण शाहा तथा प्रथम सहिद लखन थापा मगरको प्रतिमा स्थापना, नगरस्तरीय खानेपानी जलश्रोत तथा भौतिक पूर्वाधार बिकास बोर्ड गठन, गोरखा बजारमा ब्यवस्थित फुटपाथ निर्माण जस्ता कार्यक्रम पनि समेटिएका छन् ।
वडा नम्बर ८ मा रहेको डम्पिङ साईटलाई सरसफाई केन्द्रको रुपमा बिकास गर्ने, खानेपानीको मुल, ढुङ्गेधारा, ऐतिहासिक पुराना पँधेरा, कुवाको संरक्षण गर्ने, विद्यार्थी संख्याको आधारमा शिक्षक दरबन्दी मिलान एवं विद्यालय मर्ज गर्ने, विद्यालय क्षेत्र वरपर जंक फुड बिक्री बितरणलाई निरुत्साहित गर्ने, प्रसुती सट्टा सिक्षक कार्यक्रमलाई निरन्तरता दिने नीति नगरपालिको लिएको मेयर राना मगरले बताए ।
ब्यापारी तथा अन्य सार्वजनीक स्थानमा थप सिसि क्यामेरा जडा गर्ने, महत्वपूर्ण सार्वजनीक स्थानमा फ्रि वाईफाई जोन स्थापनालाई निरन्तरता दिने, ‘डिजिटल गभरमेन्ट’ को स्थापनामा जोड दिने, बेरुजु न्यूनिकरण गर्दै लैजाने नीति नगरपालिकाले लिएको छ ।
निजी तथा सामुदायिक रेडियोलाई दिइएको विद्युत महशुल शुल्कमा ७५ प्रतिशत अनुदान, पत्रकार महासंघ गोरखाको निर्माणाधिन भबनका लागि प्राविधिक तथा आर्थिक सहयोगलाई निरन्तरता दिने सञ्चार नीतिमा उल्लेख छ । पत्रिका, रेडियोलाई दिइएको सुविधामा अनलाईन पत्रिकालाई पनि समावेश गरिने भएको छ ।
मेलमिलाप पद्धतीलाई न्याय सम्पादनमा जोड दिइने, काठेपोल मुक्त नगर घोषणा गर्ने, सौर्य उर्जा प्लान्ट निर्माणका लागि संभाब्यता अध्ययन गरिने भएको छ ।
