मतदानस्थल वरपर राखिएका प्रचार सामग्री हटाउन आयोगको आग्रह
निर्वाचन आयोगले मतदान स्थल वरपर राखिएका उम्मेदवारहरूका प्रचार सामग्री हटाउनुपर्ने बताएको छ।
मतदान स्थलको तीन सय मिटर वरिपरि राखिएका उम्मेदवारका प्रचारप्रसार सामग्री मौन अवधि सुरू हुनुभन्दा पहिले नै हटाउन आयोगले आग्रह गरेको हो।
निर्वाचन आचारसंहिताअनुसार मतदान स्थल वरपर चुनावी प्रचारप्रसारका सामग्री राख्न मिल्दैन।
आज राति १२ बजेदेखि मौन अवधि सुरू हुने भएकोले त्यसअघि नै प्रचार सामग्री हटाउन आयोगले आग्रह गरेको छ।
वैशाख ३० मा स्थानीय चुनाव हुँदैछ। त्यसको ४८ घन्टाअघि मौन अवधि सुरू हुन्छ।
मौन अवधिभर निर्वाचन प्रचारप्रसार लगायत कुनै पनि प्रकारका छलफल, सभा नगर्न पनि आयोगले आग्रह गरेको छ।
सामाजिक सञ्जालबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोष्ट वा शेयर गर्न नपाइने पनि आयोगले बताएको छ।
