गोरखाको ११ वटै स्थानीय तहमा निर्वाचन अधिकृतको कार्यालय स्थापना
बैशाख ३० गते हुने स्थानीय तह निर्वाचन २०७९ का लागि गोरखाको ११ वटै स्थानीय तहमा निर्वाचन अधिकृतको कार्यलय स्थापना भएको छ । गोरखामा बिहिवार मूख्य निर्वाचन अधिकृतको कार्यालय स्थापन भएसँगै सबै पालिकाको केन्द्रमा निर्वाचन अधिकृतको कार्यालय स्थापना भएको निर्वाचन कार्यालयका प्रमुख टेकबहादुर कोईरालाले बताए ।
मूख्य निर्वाचन अधिकृत एवं जिल्ला न्यायाधिश दिनबन्धु बरालले मूख्य निर्वाचन अधिकृतको कार्यालय स्थापना गरेका हुन् । जिल्लामा क्रियाशिल राजनीतिक दलका नेताहरुको रोहवरमा जिल्ला समन्वय समितिको भबनमा बोर्ड राखेर मूख्य निर्वानचन अधिकृत बरालले कार्यालय सुभारम्भ गरेका हुन् । ‘निर्वाचन संम्बन्धी हामीले गर्नुपर्ने काम यहाँबाट अब सुरु हुन्छ’ उनले भने ।
गोरखा नगरपालिकाको निर्वाचनको सबै काम मूख्य निर्वाचन अधिकृतको कार्यालयले गर्नेछ भने अन्य पालिकालाई सघाउने, समस्या सुल्झाउने काम पनि मूख्य निर्वाचन अधिकृतको हुनेछ । निर्वाचन अधिकृतको कार्यालयमा पाँच÷पाँच जना सुरक्षाकर्मी खटिनेछन् । १० भन्दाकम वडा रहेको ठाउँमा छ जना र सो भन्दा बढी वडा रहेको ठाउँमा सात जना कर्मचारी खटिएको निर्वाचन कार्यालयले जनाएको छ । गोरखामा तीन सय ११ मतदान केन्द्र र दुई सय १५ मतदान स्थल रहेको छ ।
यस्तै मूख्य निर्वाचन अधिकृतको कार्यालय गोरखाले बिहिवार नै सर्वपक्षिय छलफल गरेको छ । जिल्ला समन्वय समितिको हलमा भएको छलफल कार्यक्रममा दलका नेताहरुले निश्पक्ष र भयरहित निर्वाचन गर्न प्रतिवद्ध रहेको बताएका छन् । साथै उनीहरुले निर्वाचन सम्पन्न गर्न खटिने कर्मचारी, सुरक्षाकर्मी लगायत सबैले निश्पक्ष भएर निर्वाचनमा आफ्नो भुमिका निर्वाह गर्नुपर्ने धारणा राखे ।
बैशाख ११ र १२ गते मनोनय दर्ताका क्रममा कुन दल कति गते, कति बजे आउने भन्ने विषयमा टुङ्गिएको छैन । नेकपा एमालेका जिल्ला सचिव काजिराम रोकाले १२ गते बिहान ११ बजे मनोनय दर्ता गर्न आउने बताए । नेपाली कांग्रेस, माओवादी, जनता समाजवादी लगायतका दलले उक्त विषयको जानकारी पार्टीमा सल्लाह गरेर दिने बताएका थिए । मूख्य निर्वाचन अधिकृत तथा जिल्ला न्यायाधिश दिनबन्धु बरालले ब्यवस्थित रुपमा मनोनय दर्ताको काम अघि बढाउन आलोपालो गरेर आउन अनुरोध गरे । ‘आचारसंहिता उलंघन नगर्ने गरी मनोनय दर्ता प्रक्रियामा सहभागी भईदिनुहोला’ उनले भने । दलहरु एकै समयमा आउँदा कामको चाप धेरै हुने, झडप हुन सक्ने तर्फ पनि ध्यान दिन उनले सुझाब दिए ।
मनोनयन दर्ताका क्रममा वडाबाट उम्मेदवार दिने सबैको समर्थक प्रस्ताबक सोही वडाको एक÷एक जना ब्यक्ति बस्न सक्छन् । पालिकाको हकमा पालिका भित्रका एक÷एक जनाले प्रमुख, उपप्रमुखलाई समर्थन गर्ने सक्नेछन् । समर्थक प्रस्ताबकको मतदाता नामावलीमा नाम समेटिएको हुनुपर्नेछ ।
