तीन हजार बालबालिकाले दोस्रो मात्रा मोर्डना खोप लगाएनन्
जिल्ला स्वास्थ्य कार्यालयको तथ्याङ्क भन्छ, कोरोना बिरुद्धको पहिलो मात्रा खोप लगाएका दुई हजार नौ सय १३ जना बालवालिकाले दोस्रो मात्रा लगाएका छैनन् । पालिका दाबी गर्छन्, पहिलो मात्रा लगाउँदा विद्यालय खुलेको र दोस्रो मात्रा लगाउँदा बन्द भएकाले खोप प्रभावित भयो ।
गोरखा नगरपालिकाभित्र पहिलो मात्रा मोर्डना खोप लगाउने १२ देखि १७ वर्ष उमेरका बालवालिकाको संख्या पाँच हजार छ सय ८५ थियो । दोस्रो मात्रा लगाउनेको संख्या जम्मा पाँच हजार १६ छ । छसय ६९ जना बालवालिकाले खोप दोहो¥याएनन् । ‘पढ्नका लागि बिभिन्न गाउँबाट सदरमुकाम आउने बालवालिका धेरै थिए । विद्यालय बन्द भएपछि उनीहरु गाउँघर फर्किए ।
त्यसैले छुटेका हुन्’, उनले भने । नगरपालिकाले विद्यालयमै बोलाएर र स्वास्थ्य संस्थामा पनि मोर्डना खोपको दोस्रो मात्रा दिएको थियो । अन्यत्र गएका बालवालिकाले स्थानीय तहले संचालन गरेको खोप केन्द्रमा लगाउन पनि सक्थे । तर जिल्लाभर सबै पालिकामा पहिलो मात्रा लगाउने भन्दा दोस्रो लगाउनेको संख्या कम छ ।
बारपाक सुलिकोट गाउँपालिकामा छ सय ४० जना बालवालिकाले दोस्रो मात्रा खोप लगाउन बाँकी छ । स्वास्थ्य कार्यालयका अनुसार दुईहजार आठसय सात जनाले पहिलो मात्रा लगाएका त्यहाँ दुई हजार एक सय ६७ जनाले दोस्रो मात्रा लगाएका छन् ।
तथ्याङ्कले बालवालिकाले खोप लगाउन नचाहेको वा बेवास्ता गरेको देखाउँछ । पालुङटार नगरपालिकामा तीन हजार छ सय ९२ ले पहिलो मात्रा लगाएका थिए भने तीन हजार चार सय ४६ बालवालिकाले मात्रै दोस्रो मात्रा लगाए । दुई सय ४६ जना बालवालिकाले मोर्डना खोपको दोस्रो मात्रा लगाउन बाँकी छ ।
दुई हजार सात सय ८४ बालवालिकाले पहिलो मात्रा खोप लगाएका आरुघाट गाउँपालिकामा दोस्रो मात्रा लगाउन बाँकी तीन सय ९५ जना छन् । दोस्रो मात्रा लगाउनेको संख्या भने जम्मा दुई हजार तीन सय ८९ रहेको छ । ‘अहिले पनि हामीले स्वास्थ्य संस्थामा बोलाएर छुटेकाहरुलाई खोप लगाईरहेका छौँ’, स्वास्थ्य शाखा प्रमुख विजय श्रेष्ठले भने ।
विद्यालय बन्द हुँदा शिक्षकलाई कसले खोप लगायो, कसले लगाएन भन्ने पनि यकिन नभएको बताउँदै उनले विद्यालय खुलेपछि पहिलो मात्रा लगाएका सबै पूर्ण खोपको दायरामा आउन सक्ने उनले बताए । शहीदलखन गाउँपालिकामा एक हजार छ सय ४९ जनाले पहिलो मात्रा लगाएका थिए भने एक हजार चार सय ८३ जनाले दोस्रो मात्रा लगाएका छन् । यहाँ एक सय ६६ जनाले दोस्रो मात्रा लगाउन बाँकी छ ।
अजिरकोट गाउँपालिकामा एक सय १४ जनाले दोस्रो मात्रा लगाएका छैनन् । एक हजार एक सय तीन जनाले पहिलो मात्रा लगाएकोमा दोस्रो मात्रा लगाउने नौ सय ८९ रहेका छन् । सबैभन्दा धेरै सिरानचोक र धार्चे गाउँपालिकामा दोस्रो मात्रा लगाइएको छ । एक हजार चार सय ५६ जनालाई पहिलो मात्रा मोर्डना खोप दिइएको त्यहाँ एक हजार चार सय १६ जनाले दोस्रो मात्रा लगाएका छन् । ४० जनाले मात्रा पुरा गर्न बाँकी छ । सिरानचोक गाउँपालिकामा ३९ जनाले दोस्रो मात्रा लगाउन बाँकी छ । एक हजार सात सय ९७ जनाले पहिलो मात्रा लगाएका थिए भने दोस्रो लगाउनेको संख्या एक हजार सात सय ५८ छ ।
गण्डकी गाउँपालिकामा एक हजार आठ सय ९७ जनाले पहिलो मात्रा खोप लगाएकोमा दोस्रो मात्रा लगाउनेको संख्या एक हजार चार सय ९३ रहेको छ । चार सय चार जनाले मोर्डना खोपको दोस्रो मात्रा लगाएका छैनन् ।
भिमसेन थापा गाउँपालिकामा एक हजार छ सय ४९ बालवालिकाले दोस्रो मात्रा खोप लगाएका छन् । पहिलो मात्रा लगाउनेको संख्या एक हजार आठ सय चार रहेको थियो । एक सय ५५ जना बालवालिका दोस्रो मात्रा लगाउन बाँकी देखिन्छन् । चुमनुब्री गाउँपालिकामा चार सय छ जनाले पहिलो मात्रा लगाएका थिए भने ४५ जनाले दोस्रो मात्रा लगाउन बाँकी छ ।
तीन सय ६१ जनाले दोस्रो मात्रा लगाएका छन् । विद्यालय बन्द हुँदा एउटा पालिकामा पहिलो मात्रा खोप विद्यालयमै लगाएका कतिपय बालवालिकाले दोस्रो मात्र अर्को पालिकामा लगाएको हुन सक्ने स्वास्थ्य शाखाका प्रमुखहरु बताउँछन् । तर जिल्लाभरको तथ्याङ्कमा बालवालिकाको दोस्रो मात्रा लगाउने अनुपात ८३ प्रतिशत मात्रै छ । विद्यालय खुलेपछि मात्रा पुरा नगरेकाहरुको पहिचान गरेर पुन खोप लगाउने योजनामा स्थानीय तहहरु छन् ।
