नेकपा एमाले जिल्ला अधिवेशनका लागि सबै वडामा प्रतिनिधि छनौट
नेकपा एमाले गोरखाको आगामि पुस २३ गते हुने सातौँ जिल्ला अधिवेशनका लागि गोरखाका सबै वडामा प्रतिनिधि छनौट भएका छन् । जिल्ला कमिटीको २८ औ वैठकमा पुस १७ गते जिल्लाका ११ स्थानीय तहका सबै वडामा जिल्ला अधिवेशनका लागि प्रतिनिधि छनौट कार्यक्रम सम्पन्न भएको जानकारी गराइएको हो ।
उत्तरी गोरखाको दुर्गम चुमनुब्री गाउँपालिकाको भने पार्टीका सबै सदस्य नै जिल्ला प्रतिनिधिका रुपमा रहने नेकपा एमाले गण्डकी प्रदेश कमिटी सदस्य कमल दानीले बताए । दुर्गम भूगोलका कारण पार्टी सदस्य भएका सबैलाई जिल्ला प्रतिनिधि बनाउने निर्णय गरेको उनको भनाइ छ ।
त्यस्तै, शनिबार बेलुकी सम्ममा जिल्लाका १० स्थानीय तहका ८७ वटा वडामा जिल्ला अधिवेशनका लागि प्रतिनिधि छनौट कार्यक्रम सम्पन्न भएको उनले जानकारी दिए । एउटा वडामा एकसय जना बराबर एक जना महिला सहित तीन जना प्रतिनिधि छनौट गरेका छन् ।
एउटा वडामा एकसय जना पार्टी सदस्य बराबर एक जना महिला सहित तीन जना, एक सयदेखि दुईसयसम्म चारजना, दुईसयदेखि तीनसयसम्म पाँच जना छनौट गर्ने गर्ने व्यवस्था रहेको र सोहि अनुसार छनौट गरेको नेकपा एमाले गोरखाले जनाएको छ ।
त्यस्तै, उत्पीडित समुदायबाट एउटा पालिकामा एकसयजना पार्टी सदस्य बराबर एकजना महिला सहित तीन जना छनौट गरिएको छ । यसमा पनि पार्टी सदस्यता अनुसार थप हुदै जाने प्रदेश कमिटी सदस्य दानीले बताए ।
त्यस्तै, जिल्ला अधिवेशनका लागि सल्लाहाकार परिषदबाट १५ जना, जनवर्गीय संगठनबाट तीन÷तीन जना सहित आयोजक साविक जिल्ला कमिटीका सबै सदस्यहरु जिल्ला प्रतिनिधिका रुपमा छनौट भएको उनले जानकारी दिए । सबै गरेर करिब सात सय भन्दा बढी जिल्ला अधिवेशनका लागि प्रतिनिधि छनौट भएको एमाले गोरखाले जनाएको छ ।
