बाढी पहिरोले गोठ बगाउँदा दर्जनौँ भेँडाबाख्रा, भैसी मरे
चारदिनदेखिको अविरल बर्षापछिको बाढी पहिरोले गोरखामा गोठ बगाउँदा दर्जनौँ भेँडा, गाईगोरु पुरेको छ ।
धार्चे गाउँपालिका १ हुलचुकमा दुईवटा गोठ पहिरोले पुर्दा ३० भन्दा धेरै भेँडा पुरिएको छ । सयभन्दा धेरै भेँडा रहेको गोठ पहिरोले पुर्दा ३० वटा पुरिएर बेपत्ता भएको, अरुलाई उद्धार गरिएको वडाअध्यक्ष दिलिप गुरुङले जानकारी दिए ।
त्यस्तै निरन्तरको झरीपछि शहिदलखन गाउँपालिका वडा नं. ७ बोर्लाङी गाउँमा धनबहादुर श्रेष्ठको गोठ भत्किँदा गोठभित्र रहेका दुई भैँसी, एक पाठा, एक बाख्रा र एक बोका पुरिएर मरेको प्रहरी एसपी शेखर खनालले जानकारी दिए ।
धार्चे गाउँपालिका ५ माछाखोलामा स्थानीयले प्रयोग गर्दै आएको काठको पुल(फड्के) बगाएको पालिकाका अध्यक्ष सन्तोष गुरुङले जानकार दिए । साथै बेनिघाट आरुघाट लार्के सडकको आर्खेत खण्डमा निर्माणाधीन पुलका कारण बनाएको बैकल्पिक सडक बूढीगण्डकीले बगाउँदा यातायात सेवा ठप्प भएको अध्यक्ष गुरुङले बताएका छन् ।
