गण्डकी प्रदेशका मन्त्री, सांसद, स्वास्थ्य निर्देशक सहित चिकित्सकको टोली बारपाकमा
गोरखाको बारपाकमा कोरोना संक्रमण समुदायमा फैलिएपछि गण्डकी प्रदेशका भौतिक पूर्वाधार बिकास मन्त्री रामशरण बस्नेत सहितको टोली बारपाक पुगेको छ ।
दुई जना विषेशज्ञ डाक्टर, एक जना मेडिकल अधिकृत, नर्सिङ स्टाफ, एक जना मनोसामाजिक परामर्शकर्ता र एक जना जनस्वास्थ्य अधिकृत सहितको टोली बारपाक पुगेको गण्डकी प्रदेशका स्वास्थ्य निर्देशक बिनोदबिन्दु शर्माले बताए ।
त्यहाँ पुगेर उक्त टोलीले घरघरै बिरामीको जाँच गर्नेछ । कोरोनाको लक्षण भएकाले परीक्षण नगराएको हुँदा उनीहरुलाई सचेतना जगाउन स्थानीय अगुवालाई परिचालन गरिने, मनोसामाजिक परामर्श दिने, उपचार गर्ने र औषधी बितरणको काम चिकित्सक सहितको टोलीले गर्नेछ ।
ऐन्टिजेन, पिसिआर दुबै जाँच गरिने निर्देशक शर्माले बताए । ‘त्यहाँ उपचार गर्न नसकिएकालाई गोरखा अस्पताल र गोरखामा पनि नसकिएकालाई पोखरा लगेर उपचार गर्नेछौँ’ निर्देशक शर्माले भने । जिल्लाबाट पनि डाक्टर सहितको एक टोली बारपाक गएको छ । चिकित्सकको टोली दुईदेखि तीन दिन सम्म त्यहाँ रहनेछन् ।
संक्रमण दर बढेको र लागातार मानिसको मृत्यू हुन थालेपछि गण्डकी प्रदेशका स्वास्थ्य निर्देशक लिएर सरकार प्रवक्ता समेत रहेका मन्त्री बस्नेत आफैँ बारपाक पुगेका हुन् । सँगै गण्डकी प्रदेशका सांसद प्रकाशचन्द्र दवाडी, धनमाया लामा पोखरेल पनि बारपाक पुगेका छन् ।
गाउँपालिकाले स्वास्थ्यकर्मीको थप टोली पठाएको जनाएको छ । लगातार वर्षातका कारण बारपाक जाने कच्ची सडकमा यात्रा गर्न भने त्यसतर्फ हिँडेका टोलीलाई सास्ती भएको छ । बारापकमा जेठ १ गतेयता मृत्यू हुनेको संख्या १३ पुगेको छ ।
तस्वीरहरु सौजन्य : खेमराज घले
