भारतबाट आउनेहरु हेपाइमा : क्वारेण्टाइन बनाउन ठाउँठाउँमा अबरोध
कोरोनाबाट बच्न भारतबाट आफ्नो गाउँठाउँ आएकाहरुलाई आफन्तहरुले हेप्ने गरेका छन् । संक्रमित भएर आएको र समुदायमा संक्रमण फैलाउने आरोप लगाउँदै गोरखाका बिभिन्न ठाउँमा क्वारेण्टाइन बनाउन अबरोध गरेका छन् ।
अबरोधका कारण धार्चे गाउँपालिकाले अहिलेसम्म क्वारेण्टाइन बनाउन सकेको छैन । ‘हामीले माछाखोलामा क्वारेण्टाइन बनाऔं भन्यौ, स्थानीयबासी तयार भएनन् । लापुवेशीको प्रभातकिरण माविमा बनाऔं भन्यौँ । त्यहाँ पनि स्थानीयले छेकथुन गरे’, उपप्रमुख फूलमाया गुरुङ भन्छिन्, ‘अहिले गाउँपालिका प्रवेश गर्ने ठाउँमा जंगलको बीचमा क्वारेण्टाइन बनाउने भनेर जमिन खार्न थालिएको छ ।’ त्यहाँ पनि अर्को भीरकुनाका गाउँलेले राख्न दिन्नौं भनेको अनौपचारिक रुपमा सुन्नमा आएको उनले बताइन् ।
गाउँपालिकाभरि सामुहिक क्वारेण्टाइन नहुँदा भारतबाट आएका धार्चे गाउँपालिकाका १० जना आरुघाट गाउँपालिकाको भीमोदय माविको क्वारेण्टाइनमा रहेका छन् ।
भारतबाट धमाधम भित्रिन थालेपछि भीमसेन गाउँपालिकाले घ्याम्पेशालमा क्वारेण्टाइन बनाउने तयारी गरेको थियो तर स्थानीयले अबरोध गरेपछि नसकिएको अध्यक्ष इश्वर पाण्डे बताउँछन् । ‘त्यसपछि हामीले साविकको वडा नं. तीनको कनकामना विद्यालयमा बनायौं । त्यहाँ तीन जना राखेका थियौँ । त्यहाँ पनि अर्को गाउँको मान्छेलाई राख्न दिएनन् । फेरि विन्द्रावती माविमा पनि बनाउनु प¥यो ।’
धेरै ठाउँका मान्छे अट्ने गरी वडा नं. ६ को नवजागृति माविमा धेरै क्षमताको सामुहिक क्वारेण्टाइन बनाउन स्थानीयबासीले अवरोध गरेपछि अहिले गाउँगाउँमै क्वारेण्टाइन बनाउनु पर्ने अबस्था आएको अध्यक्ष पाण्डेले बताए ।
पालुङ्टार नगरपालिका वडा नं. १ मा क्वारेण्टाइन बनाउने बिषयमा भएको विवाद तीनदिनपछि बल्ल समाधान भएको वडा अध्यक्ष कृष्णबहादुर परियार बताउँछिन् । ‘आफ्नो गाउँ नजिक बनाउन कोही पनि मान्दैनन् । कोही सातदोबाटेमा बनाउनु पर्छ भनेर उता देखाउँछन् । उताको मान्छे विन्दवासिनीमा बनाउनु पर्छ भनेर पन्छाउँछन् । कोही अन्नपूर्ण माविमा बनाउनु पर्छ भनेर सार्छन्’, उनी भन्छन्, ‘बल्लतल्ल अन्नपूर्ण माविमा बनाउने भनेर हिजो(सोमबार) अबेर सहमति भएको छ ।’
सोही नगरपालिकाको वडा नं. ९ मा पनि क्वारेण्टाइन बनाउने बिषयमा विवाद भएको वडा अध्यक्ष भेजराज पाण्डे बताउँछन् । एउटा वडाको एक ठाउँमा बनाउने भनिएको क्वारेण्टाइन अवरोधका कारण तीन ठाउँमा बनाउनु परेको उनले बताए ।
क्वारेण्टाइन बनाउन अवरोध होइन, साहयोग गर्नुपर्ने जिल्ला प्रहरी प्रमुख एसपी ओम अधिकारी बताउँछन् । भारतबाट फर्कनेलाई उपेक्षा नगर्न उनको सुझाव छ । ‘भारतमा काम गर्न गएका पनि हाम्रै दाजुभाइ हुन् । लकडाउनका कारण कामबिहिन भएपछि आफ्नो घर फर्केका हुन् । उनीहरु आउँदैमा सबैले कोरोना बोकेर आएका हुदैनन् । यसरी छिःछिः र दुरःदुर गर्नुहुदैन’, एसपी अधिकारी भन्छन्, ‘उनीहरुलाई सुरक्षित तवरले क्वारेण्टाइनमा राख्नुपर्छ । यदि सबै ठाउँमा क्वारेण्टाइन बनाउन अवरोध भयो भने उनीहरु सिधै समुदायमा जान्छन् । झन जोखिम बढ्न सक्छ । बिषयको गम्भीरता बुझ्नु पर्छ । क्वारेण्टाइन बनाउन अवरोध होइन, सहयोग गर्नुपर्छ ।’
गोरखामा हालसम्म छसय ८३ जना अट्ने क्षमताको क्वारेण्टाइन छ । अहिले दुईसय ६२ जना क्वारेण्टाइनमा रहेको र यसअघि २२५ जना क्वारेण्टाइनमा बसेर फिर्ता भइसकेको जिल्ला प्रशासन कार्यालयले जनाएको छ ।
