गण्डकी गाँउपालिकाले ल्यायो ५१ करोडको बजेट,
चेपाङ समुदायमा एक घर एक चिउरीको बोटको नीति,
जिल्लाको गण्डकी गाउँपालिकाले आउँदो आर्थिक बर्षका लागि ५१ करोड ५८ लाख पाँचहजार रुपैंया बजेट प्रस्ताब गरेको छ । गाउँपालिकाका प्रमुख होमबहादुर रानाको अध्यक्षतामा मंगलबार सम्पन्न पाँचौ गाउँसभामा उपप्रमुख ललिता अधिकारीले सो आर्थिक बिधेयक प्रस्तुत गरेकी हुन् ।
साथै गाउँपालिका प्रमुख रानाले प्रस्तुत गरेको नीति कार्यक्रममा पर्यटन विकासलाई जोड दिइएको छ । घ्याल्चोकको बेनीगाउँ, दर्बुङको रानीस्वाँरा र ताङ्लीचोक को महादेवडाँडामा होमस्टे सञ्चालन गर्ने, दक्षिण एशियाकै ठूलो भनेर कहलाएको फुजेलको समीको रुखको संरक्षण गर्नेलगायत का कार्यक्रम सार्वजनिक गरिएको वडा नं. ७ का अध्यक्ष तुलसी रेग्मीले जानकारी दिए ।
साथै बजेट तथा कार्यक्रममा पूर्वाधारका १८ वटा योजना प्रस्ताब गरिएको छ । त्यस्तै तीनवटा स्वास्थ्य इकाइ निर्माण गर्ने प्रस्ताब पनि गरिएको उनले बताए ।
सो गाउँपालिकाभित्र अतिसिमान्त कृत चेपाङ समुदाय रहेको र उनीहरुका लागि महत्वपूर्ण मानिने चिउरीको रुखको संरक्षण गर्न एक घर एक चिउरीको रुखको अबधारणा नीति तथा कार्यक्रममा आएको रेग्मीले जानकारी दिए । त्यसका लागि खालि ठाउँमा चिउरी रोप्ने, चेपाङ संग्रहालय स्थापना गर्ने जस्ता कार्यक्रम प्रस्ताब गरिएको छ । प्रस्तावित नीति, कार्यक्रम तथा बजेटको बारेमा छलफल जारी रहेको वडा अध्यक्ष रेग्मीले बताए ।
