छेवेटारको बृद्धाश्रम मानव सेवा आश्रममार्फत संचालन हुने
गोरखा नगरपालिका वडा नं १० छेवेटारमा निर्माण सम्पन्न भई संचालनमा आउन नसकेको गण्डकी प्रदेश जेष्ठ नागरिक आश्रम अब संचालनमा आउने भएको छ । मानव सेवा आश्रममार्फत प्रदेश जेष्ठ नागरिक आश्रम संचालनमा ल्याउने सम्झौता भएको हो ।
मंगलबार गोरखा नगरपालिका वडा नं १० को रोहवरमा एकीकृत सेवा कार्यालय गोरखा र मानव सेवा आश्रम बीच उक्त सम्झौँता भएको वडाअध्यक्ष प्रदिप कुँवरले बताए । गण्डकी प्रदेश जेष्ठ नागरिक आश्रम संचालन कार्यविधि, २०८२ अनुसार ५ वर्षका लागि मानवसेवा आश्रमले बृद्धाश्रम संचालन गर्ने सम्झौँता भएको कुँवरले जानकारी दिए ।
६० वर्ष उमेर पुगेका, जीवनयापन गर्ने कुनै आधार, आयस्रोत वा सम्पत्ति नभएका, पालनपोषण वा हेरचाह गर्ने परिवारका कुनै सदस्य नभएका र पारिवारिक सदस्य भएर पनि पालनपोषण नगरी अपहेलित जीवन बिताउन बाध्य भएकाहरुलाई आश्रमले आश्रय दिने प्रदेशको कार्यविधिमा उल्लेख गरिएको छ ।
