गोरखाको छेवेटारमा संचालित खाजा घरमा आगलागी
गोरखा नगरपालिका–१० छेवेटारमा संचालित खाजा घरमा आगलागी भएको छ ।
सिरानचोक गाउँपालिका छोप्राककी गिता पोखरेलले संचालन गर्दै आएको खाजा घरमा शुक्रवार बिहान करिव तीन बजेको समयमा आगलागी भएको प्रहरीले जनाएको छ ।
टिनले बारेको र टिनले नै छाएको खाजा घरमा आगलागी भएको हो । आगलागीका कारण पसल पूर्ण रुपमा क्षति भएको प्रहरी नायव उपरीक्षक इन्द्रप्रसाद सुवेदीले बताए । ‘के कारणले आगलागी भएको खुलेको छैन,’ उनले भने, ‘क्षतिको एकिन विवरण पनि आउन बाँकी छ ।’
स्थानीय र प्रहरीको सहयोगमा आगो नियन्त्रणमा लिइएको र घटनाबारे थप अनुसन्धान भइरहेको उनले जानकारी दिए ।
