कक्युपा संप्रदायका प्रमुख लामा गुरु ठाङ्गु रिम्पोछेको निधन
नमोवुद्धस्थित वुद्ध ध्यान तथा शैक्षिक केन्द्रका प्रमुख तथा ठाङ्गु टासी छ्योलिङ गुम्बाका प्रमुख लामा गुरु योङ्जेन खेन्छेन ठाङ्गु रिम्पेछेको निधन भएको छ । कग्यु संप्रदायका मुल गुरु ठांगु रिम्पोछेको ९१ बर्षको उमेरमा निधन भएको सो गुम्बाले विज्ञप्ति जारी गरी औपचारिक पुष्टि गरेको हो ।
भोट पात्रो अनुसार चौथो महिनाको पूर्णिमाका दिन(गत आइतबार) उनको निधन भएपनि धार्मिक मान्यता अनुसार केही दिन खबर सार्वजनिक नगरिएको विज्ञप्तिमा भनिएको छ ।
लामा गुरु योङ्जेन खेन्छेन ठाङ्गु रिम्पेछेको पहलमा तिब्बत, नेपालको नमोवुद्ध, वौद्ध, क्यानडा, भक्तपुर, भारतको वाराणासी, नेपालको स्वयंभू, मनाङ लगायतका विभिन्न ठाउँमा ठांगु टासी छ्योलिङ गुम्बा निर्माण भएको छ । त्यस्तै गोरखाको चुम तथा नुब्री क्षेत्रका विभिन्न ठाउँमा पनि सोही नाममा गुम्बा तथा ध्यानकेन्द्र निर्माण भई सञ्चालनमा छन् ।
उनले काठमाडौंका विभिन्न ठाउँमा हिमाली भेगका बालबालिकालाई छात्रवृत्तिमा पढाउनका लागि विद्यालय सञ्चालन गरी हजारौँ विद्यार्थीहरुलाई पढाइरहेका छन् ।
