असल छिमेकीद्वारा तीन लाख ४६ हजारको बिपद् ब्यवस्थापन सामग्री सहयोग
असल छिमेकी नेपाल पोखराले गोरखामा तीन लाख ४६ हजार चार सय ३० रुपैयाँ बराबरको बिपद् ब्यवस्थापन सामग्री हस्तान्तरण गरेको छ । संस्थाका सचिव प्रकाश खत्रीले सोमवार एक कार्यक्रका बीच जिल्ला बिपद् ब्यवस्थापन समितिमार्फत सशस्त्र प्रहरी बल गुल्म गोरखाका गणपति सुजित बिष्टलाई उक्त सामग्री प्रदान गरेका हुन् ।
खोज तथा उद्धारमा प्रयोग हुने डोरी, हेल्मेट, चेन, फायर फाईटिङ ग्लोब्स, लाईफ ज्याकेट लगायतका सामग्री प्रदान गरिएको असल छिमेकी नेपालका कार्यकारी निर्देशक राजेन्द्रकुमार अधिकारीले बताए ।
उक्त सामग्री ग्रहण गर्दै सशस्त्र प्रहरी बल गुल्म गोरखाका गुल्मपति सुजित बिष्टले सुरक्षा टिमको एकल प्रयासले मात्र बिपद् ब्यवस्थापन, खोज उद्धार सम्भव नभएको बताउँदै सबैको सहकार्य हुन जरुरी रहेको बताए । साथै यस्ता सामग्रीले छिटो उद्धार गर्न सहज हुने हुँदा थप गर्दै जानुपर्ने आवश्यक रहेको बताए ।
प्रमुख जिल्ला अधिकारी शंकरहरि आचार्यले सबै बिपद् ब्यवस्थापन न्यूनिकरणकालागि सबै निकायसँग सहकार्य गर्दै आएको बताए । संघ संस्थाले दिएका, सरकारले खरिद गरेका सामग्री बेला बेला प्रयोग गरेर दुरुस्त राख्नुपर्ने बताउँदै उनले आवस्यक परेको बेला खिया लागेर थन्किएको हुन नहुने बताए ।
गोरखा नगरपालिकाका नगरप्रमुख कृष्णबहादुर राना मगरले असल छिमेकी नेपालले दिएको सामग्रीले गोरखामा बिपद् आईपरेका बेला सहयोग पुग्ने बताए । जिल्ला समन्वय समिति उपप्रमुख लीला परियारले बिपद्को पूर्व तयारी सँधै गर्नुपर्ने बताउँदै कहिले कतिखेर बिपद् आइपर्छ भन्ने कुनै ठेगान नभएको बताईन् ।
२०७२ को बारपाक भूकम्पयता असल छिमेकी नेपाल पोखराले गोरखामा निरन्तर सहयोग गर्दै आएको असल छिमेकी नेपालका अनुगमन मूल्याङ्कन बिभागका प्रमुख दिनेश केसीले बताए ।
