हातपात गरी अभद्र व्यवहार गरेको आरोपमा चुमनुव्रीका एक व्यक्ति पक्राउ
उत्तरी गोरखाको चुमनुव्री गाउँपालिका–३ फिलिम बस्ने ४९ बर्षीया कान्छी गुरुङलाई हातपात गरेको आरोपमा एक व्यक्ति पक्राउ परेका छन् । पक्राउ पर्नेमा सोही स्थानका २२ बर्षीय धनबहादुर गुरुङ रहेको प्रहरीले जनाएको छ ।
शनिवार साँझ पाँच बजेको समयमा धनबहादुरले कान्छीलाई अनावश्यक रुपमा गालीगलौज गर्नुका साथै हातपात समेत गरी अभद्र व्यवहार गरेको डिएसपी रमेशकुमार श्रेष्ठले बताए ।
इलाका प्रहरी कार्यालय आरुघाटबाट खटिएको टोलीले सोमवार धनबहादुरलाई पक्राउ गरेको र उनीबिरुद्ध अभद्र व्यवहार कसूर शीर्षकमा मुद्दा दर्ता भएको श्रेष्ठले जानकारी दिए । घटनाबारे थप अनुसन्धान भइरहेको बताइएको छ ।
