कांग्रेस गोरखाद्वारा राष्ट्रिय सभा निर्वाचनमा उम्मेद्वारका १६ आकांक्षीको नाम सिफारिस
नेपाली कांग्रेस गोरखाले माघ ११ गते हुने राष्ट्रिय सभा निर्वाचनमा उम्मेद्वार बन्न चाहने आकांक्षीहरुको नाम सिफारिस गरेर पठाएको छ । सोमवार बसेको पार्टी जिल्ला समितिको पदाधिकारी एवं उपलब्ध जिल्ला सदस्यहरुको बैठकले निर्णय गर्दै कुल १६ जनाको नाम सिफारिस गरी पठाएको हो ।
महिलाबाट तीन, अपाङ्ग र अल्पसंख्यकबाट चार र अन्यबाट नौ जनाको नाम सिफारिस गरी पठाइएको कांग्रेस गोरखाका सचिव किशोरजंग थापाले बताए । उनका अनुसार महिलातर्फबाट रविकला खनाल, मनकुमारी गुरुङ र कमला लामिछानेको नाम सिफारिस भएको छ । अपाङ्ग तथा अल्पसंख्यकबाट सिफारिस हुनेमा हरिबहादुर घले, दिपक हमाल, जगत बराम र हरिबहादुर गान्धारी रहेका छन् ।
अन्यबाट भने चिनकाजी श्रेष्ठ, अब्दुल सतार, किरणबाबु श्रेष्ठ, जिवनप्रेम श्रेष्ठ, पूर्णबहादुर दाहाल, कृष्णबहादुर आले, बिश्वदेव श्रेष्ठ, मोहनप्रकाश पोखरेल र युवराज बास्ताकोटीको नाम सिफारिस भएको थापाले जानकारी दिए । ‘पार्टीको गण्डकी प्रदेश समितिमा जिल्लाले नाम सिफारिस गरेर पठाएका हौँ, अब प्रदेशले केन्द्रमा सिफारिस गरेर पठाउँछ । अन्तिम निर्णय केन्द्रले गर्छ,’ उनले भने । २९ मंसिरमा बसेको कांग्रेसको केन्द्रीय कार्यसम्पादन समितिको बैठकले १० पुसभित्र तीन जनाको नाम सिफारिस गर्न प्रदेश समितिहरुलाई निर्देशन दिएको थियो । प्रदेशले पनि जिल्ला कार्यसमितिलाई तीन जनाको नाम सिफारिस पत्राचार गरेको हो ।
नेकपा माओवादी केन्द्र र नेकपा एमालेले भने केही दिनमा नामहरु सिफारिस गरेर पठाउने जनाएको छ । राष्ट्रियसभा निर्वाचनका लागि २३ पुसमा मनोनयन दर्ताको कार्यतालिका छ । राष्ट्रियसभामा आगामी फागुन २० गते रिक्त हुने १९ पदमा चुनाव हुन लागेको छ । राष्ट्रियसभा सदस्य प्रदेशस्तरमा हुने चुनावबाट निर्वाचित हुन्छन् र यसपटकको चुनावमा सातमध्ये कुनै प्रदेशमा ३ र कुनैमा २ पदका लागि चुनाव हुँदैछ ।
