गोरखा नगरपालिका १३ का कृषकहरुलाई नौ लाख बराबरको कृषि तथा पशुपन्छी सामग्री वितरण
गोरखा नगरपालिका वडा नं १३ का कृषकलाई नौ लाख ५० हजार रुपैयाँ बराबरको कृषि सामग्री वितरण गरिएको छ । वडाभित्र रहेका कृषकलाई स्वरोजगार तथा उद्यमी बनाउनका लागि ६ प्रकारका कृषि तथा पशुपन्छी साम्रग्री वितरण गरिएको वडा अध्यक्ष मित्रा परियारले बताइन् ।
बुधबार एक कार्यक्रमका बीच स्प्रेपम्प ८९ वटा, मौरीको घार ५९ वटा, मकै छोडाउने मेसिन १० वटा, धान कुट्ने मिल तीन वटा र एक हजार लिटर क्षमताको ५ वटा पानी टंकी वितरण गरिएको उनले जानकारी दिइन् ।
कुखुराका दाना, पानी खुवाउने आठ लिटरका भाडा ४ सय ७० वटा र दाना खुवाउने भाडा ४ सय ७० वटा वितरण गरिएको बताइएको छ । वडाभित्रका एकसय ६२ वटा संस्था, फर्म, व्यक्ति र टोल विकास संस्थालाई उक्त सामग्री वितरण गरिएको हो ।
आर्थिकवर्ष २०७९÷०८० को बजेटले उक्त कृषि सामग्री वितरण गरिएको उनले बताइन् । सो कृषि सामग्रीमध्ये स्प्रेपम्प २० प्रतिशत, मौरीको घार २५ प्रतिशत, मकै छोडाउने मेसिन ३० प्रतिशत, धान कुट्ने मेलमा ४० प्रतिशत, पानी हिल्ड्याकमा २० प्रतिशत र कुखुराको दानी पानीको भाडामा २० प्रतिशत किसानको लागत सहभागिता रहेको वडा अध्यक्ष परियारले जानकारी दिइन् ।
बैदेशिक रोजगारीका लागि विदेश जाने युवाहरुको रोक्न र कृषि कर्म गरिराखेका किसानहरुलाइ राहत महसुस गराउनका लागि उक्त सामग्री वितरण गरिएका उनले बताइन् ।
वडा अध्यक्ष परियारको अध्यक्षता तथा गोरखा नगरपालिकाकी उपप्रमुख मसली माया थोकरको प्रमुख आतिथ्यतामा भएको कार्यक्रममा टोल विकास संस्थाबाट धनकुमारी गुरुङ, वडा सदस्य कृष्णप्रसाद काराखेती लगायतले मन्तव्य राखेका थिए ।
