| बुधबार, चैत्र २६, २०७६

विदेशी अवैध नागरिकको सुरक्षित आरक्ष बन्दै गोरखा, रोहिंग्या शरणार्थी चारबर्षदेखि गोरखामा

बर्माको रखायनबाट सन् २०१२ मा भागेर नेपाल पसेका ३० बर्षका अबुल उस्मान सपरिवार गोरखामा बस्दै आएका छन् ।

साथै उनले अन्य रोहिंग्या शरणार्थीको साथ लिएर भूकम्प पीडितहरुको घर बनाउने काम गरिरहेको पाइएको छ । अहिले उनी श्रीमती आशिका बिबी, दुई छोरीहरु सतरा बेगम र प्रमिना आतवसहित गोरखा नगरपालिका २ कोखे आहालेको प्रहरी चौकीको आडमा डेरा गरेर बस्ने स्थानीय गयासुद्धिन मियाँ बताउँछन् ।

घर बनाउने ठेक्का लिएर उनले डेरागाउँ, अश्राङ, झिँगटे, कोखे लगायतका ठाउँमा घर बनाउने काम गर्ने स्थानीयबासी बताउँछन् । २० बर्षका महम्मद सलिम, २६ बर्षका सिकन्दर मियाँ, २५ बर्षका अफ्ताब हुसेन, २१ बर्षका मोहम्मद अब्दुल्लाह र १७ बर्षका मोहम्मद सादक २०७२ सालको भूकम्पदेखि यहाँ बस्दै आएका हुन् ।

शरणार्थीलाई शिविरबाट बाहिर निस्केर काम गर्नुलाई अबैध मानिए पनि उनीहरु बिगत चारबर्षदेखि गोरखामा काम गरिरहेका हुन् ।

रोहिंग्या शरणार्थीले भूकम्पपछि यहाँको मुस्लिम बस्तीका करिब ३० भन्दा धेरै घर बनाइसकेका स्थानीयबासी बताउँछन् । ‘आहाले, गाईखुर, डेरागाउँ र झिँगटेमा काम ग¥यौं’, अबुल उस्मान भन्छन्, ‘ठेक्का लिन्छौं । अनि काठमाडौं कपन क्याम्पबाट मान्छे बोलाउँछौं र काम गर्छौं । एक महिनामा एउटा घर तयार गरिदिन्छौं ।’ मुस्लिम बस्तीबाहेक कामका लागि अरु गाउँमा भने अहिलेसम्म नगएको उनीहरु बताउँछन् ।

भूकम्प पीडितले पाउने तीनलाख रुपैंया अनुदानको घर उनीहरुले बनाएका स्थानीयबासी बताउँछन् । अरुले भन्दा धेरै नै सस्तो दरमा काम गर्ने भएकाले गाउँलेले उनीहरुलाई खोजीखोजी काम दिने गरेको स्थानीयबासी गयासुद्धिन मियाँको भनाइ छ ।

गोरखाका ग्रामीण भेग विदेशी नागरिकको अवैध बसोबासका लागि सुरक्षित आरक्ष बनेको छ । शरणार्थी बनेर आएकाले जीविका चलाउने स्थलदेखि भ्रमण भिसामा आएकाहरुले बिभिन्न काम गरेर बस्ने सुरक्षित स्थलको रुपमा गोरखालाई प्रयोग गरिरहेको पाइएको छ । कोही कफीखेती गरेर कोही गाई पालेर, कोही पढाएर र कोही धर्मप्रचार गरेर बस्ने गरेको स्थानीयहरु बताउँछन् ।

अनाधिकृत रुपमा बसेकाहरुको खोजी भइरहेको प्रमुख जिल्ला अधिकारी सुरेन्द्र पोडेलले बताए । ‘अहिलेसम्म हामीले २० जना भन्दा धेरैलाई जिल्ला छाड्न निर्देशन दिइसकेका छौं’, प्रजिअ पौडेलले भने, ‘अझै गाउँगाउँमा छन् भन्ने जानकारी आइरहेको छ । उनीहरु सबैलाई हामी भिसा अनुसारको काममा फर्काउँदैछौं ।’

प्रतिक्रिया दिनुहोस्