गोरखामा पहिलो पटक सूचनाको हकसम्बन्धी ऐनको प्रयोग, दिएको सूचना पनि अपूरो
कार्यालयको सेवा प्रबाह बारे पत्रिकामा प्रकाशन गर्ने प्रयोजनका लागि जानकारी लिन गोरखामा पहिलो पटक सूचनाको हकको प्रयोग गरिएको छ । दरौंदी दैनिकका पत्रकार शिव उप्रेतीले सूचनाको हकसम्बन्धी ऐन २०६४ को दफा ४ प्रयोग गरेर भेटरीनरी अस्पताल तथा पशु सेवा विज्ञकेन्द्रबाट अनुदान प्रदान गरिएका समूह, फर्म तथा सहकारीको विवरण माग गरेका हुन् ।
सूचना पार्टीमा टाँस गरेर सार्बजनिक गराउनु पर्ने सूचना समाचार प्रयोजनका लागि माग गर्दा कार्यालय प्रमुख ब्रजकिशोर ठाकुरले अस्वीकार गरेपछि सूचनाको हकसम्बन्धी ऐनको प्रयोग गरेर सूचना माग गरिएको उप्रेतीले जानकारी दिए ।
सूचना माग गरिएको केही समयपछि कार्यालय प्रमुख ठाकुरले यसअघि नै तयार गरेर राखिएको विवरणको फोटोकपी उपलब्ध गराएका थिए । आफूले काम गर्ने सँस्थाको परिचय पत्र देखाएर सूचना माग गर्दा नदिएपछि सूचनाको हक सम्बन्धी ऐनको प्रयोग गरिएको उप्रेतीले बताए ।
कार्यालय प्रमुख ठाकुरले माग गरिएको पूरा विवरण भने दिएका छैनन् । अनुदान लगेका फर्म, समूह तथा सहकारीले गरेको कामको प्रगति विवरण माग गरेपनि कार्यालय प्रमुखले सो बारे सूचना नदिएको उप्रेतीले बताए ।
यसअघि जिल्ला स्वास्थ्य कार्यालयमा पनि सूचनाको हकको प्रयोग गरेर तालिमको भत्ता वितरण बारे जानकारी माग गरिएको थियो । तर समाचार प्रयोजनका लागि भने यो पहिलो पटक सूचनाको हकको प्रयोग भएको हो ।
सो कार्यालयमा सूचना अधिकारीको समेत व्यबस्था गरिएको छैन ।
कार्यालयको सबै गतिबिधि पारदर्शी हुने भएकाले सूचना लुकाउने प्रयास गर्न नहुने पत्रकार महासंघ गोरखाका अध्यक्ष किशोर जंग थापाले बताए । ‘कार्यालयले गरेको सेवा प्रबाह बारे तीन–तीन महिनामा सार्वजनिक गर्नुपर्नेमा सहज तरिकाले सूचना माग गर्दा पनि आनाकानी गर्ने प्रवृत्ति गलत हो’, थापाले भने, ‘पत्रकारले समाचार प्रयोजनका लागि सूचना माग गर्दा त यत्तिको बाधा अड्चन हुन्छ भने त्यो कार्यालयमा सर्वसाधारणको पहुँच कस्तो रहेछ भन्ने यही घटनाले छर्लङ्ग हुन्छ ।’
